Shillong, Jylliew 3: Ka Meghalaya EMRI Worker Union (MEMRIWU) hadien ba la dep mad ïa ki nongpyniaid ba pyntyllun ïa ki kali kit nongpang 108 na ka GVK bad hadien na ka National Health Mission (NHM), mynta kila dawa ba ka sorkar kadei ban shimti noh hi ban pyniaid ïa ki kali kit nongpang 108.
Haba kren sha ki lad pathai khubor u Bah Roypar Kharraswai uba dei u President jong ka MEMRIWU u la on ba naduh ba la sdang ha u snem 2008, mynta ka EMRI 108 kala kynjoh 18 snem bad shibun ki jingjia ba phyla ki la mad bad ïa kynduh ba don ki long kmie kiba la kha khun hapoh kine ki kali kit nongpang 108.
Hadien ba la beh kam noh ïa ka GVK ka sorkar kala aiti shipor ba tang lai bnai ha ka NHM ha u snem 2022, hynrei haduh mynta ka dang bteng bad hapoh ka jingpyniaid jong ka NHM ruh ka mih kumjuh ka jingeh namar ba la aiti ha u wei u briew ban ban pyniaid uba ym don ka jingtipbad ka jingshem phang ia ka kam, ong u Bah Kharraswai.
“Haduh mynta baroh ki nongtrei EMRI ki shu ioh beit tang ka tulop, hynrei ki jingmyntoi kiba dei ban ioh kim shym la ioh satia kumta ka MEMRIWU kala dawa ba ka sorkar kadei ban ithuh noh ïa ki nongtrei ka ERMI 108” ong u Bah Kharraswai.
Shuh shuh u la ong, kumba kiwei ki nongtrei sorkar ki ioh ïa ki jingmyntoi ngi ruh ngi dei ban ioh bad ha kane ka kam ba ngi trei kam ju don kata ka promotion ne kiew kyrdan.
U Bah Roy u la pyntip ba ki nongtrei ka EMRI ki duna bha ki briew bad lada don kiba shim shuti bun ki kam kila sahteng.
