Nongstoiñ, Jylliew 03: Ka Mawshynrut konstitwensi ka la long kawei na ki konstitwensi kaba la donbok shisha, ha kaba mynta ka kynti ka la ïoh sa ïa ka Goverment Model Degree College, kaba la bei tyngka da ka Ministry of Human Resources jong ka sorkar kmie lyngba ka Rashtriya Uchchatar Shiksha Abhiyan (RUSA).
Ha kaba ïadei bad katei ka college na ka liang u nongthoh khubor u la ïoh ban kylli pyrthew ruh na ki katto katne ngut ki nongshong shnong katei ka thaiñ, kiba kynthup ïa ki riew rangbah bad ki longkmie, ha kaba ki la ong ba nyngkong eh ki la mut ba kane ka college kan dang slem ban dep, namar ka sorkar barabor ka shim por ban sdang ïa ka ban tei.
Ki da pynpaw ka jingkmen ba mynta lyngba ki dak ki shin ka la paw shai ba ym slem shuh ïa ka ban tei dep ïa katei ka College, namar ka jingpyntrei ka la sdang ban ïaid shait shait man la ka sngi. La khmih lynti ba ka jingïoh ïa katei ka college hapoh Mawshynrut kan ai jingmyntoi ym tang ïa ki paidbah jong ka Mawshynrut, hynrei ïa ki nongshong shnong kiba marjan bad ïa ka thaiñ hi baroh kawei.
Kum ban shu pynkynmaw ba ha kaba ïadei bad katei ka college na ka liang u Bah Methodios Dkhar, Myntri ka sorkar jylla bad MLA ka Mawshynrut ha ryngkat ka jingïadonlang ki riew rangbah bad ki nongshong na ka thaiñ, dang ha u bnai Nohprah jong u snem 2025, ki la leit ban jurip bad ai laiñ ïa katei ka jaka na ka bynta ban shna noh ïa ka building ba pura jong katei ka college, kaba la mang haduh kumba 15 klur ei ei bad mynta la ïohi ba ki kam ki la sdang ban kren kham jam ban ïa ka ktien.
U bah Breswell Paliar u ba dei uwei na ki riew rangbah jong katei ka thaiñ u la ong ba ka jingïoh ïa kane ka college sorkar, kan kham pynsting ïa ki jingkit ba khia jong ki kmie ki kpa, khamtam kiba duna ha ka ïoh ka kot ban phah pule ïa ki khun jong ki, namar hadien ba la dep tei ïa kane ka college, ki samla pule kim donkam shuh ban dang ïabeh ban leit pule shabar ryngkat ka jinglut ba heh, hynrei kin ïoh ban bteng ïa ki jingpule jong ki ha la ka jong ka jaka, ym da donkam shuh ban leit shabar.
