Pynkup burom ka NPP Umroi Block ïa u Bah Damanbait Lame kum u MLA ba thymmai ka Umroi

0

Nongpoh, Ïaiong 08: Da ka jingsarong bad ka jingkmen mynta ka sngi Saitjaiñ ki nongïalam ka NPP Umroi Block rynhkat ki paidbah nongkyrshan ki la pynkup burom ïa u Bah Damanbait Lamare kum u MLA ba thymmai ka Umroi, kaba dei hadien ba ki paidbah ka Umroi ki la pynkup bor bad jied ïa u ban long uta u nongmihkhmat katei ka Constituency ha kane ka election jied nongmihkhmat kaba dang shu dep shen hapoh ka jylla.
Ïa kane ka jingpynkup burom la pynlong ha Madan Kurkalang, Bhoirymbong ha kaba la sakhi lang ruh ha kane ka sngi da ka jingdon lang u MDC ka Umroi, u Bah R.R Kharbuki, u Ma Ngaitlang Dhar, uba dei u kpa jong u MLA, u Bah Dasakhiat Lamare, MLA barim ka Mawhati, u Bah Pynhun Ronghang, uba dei u State General Secretary ka NPP bad kynthup kiwei kiwei ki nongïalam ka NPP na Umroi bad na Ri Bhoi District.
Kum ka dak ka jingai burom ïa une u MLA ba thymmai ka Uroi Constituency, ki nongshong shnong, ki seng longkmie, ki seng samla bad ka NPYF Umroi ki la pynkup burom ruh ïa une u Samla Damanbait Lamare da ki tiar sah jingkynmaw bad ki jingai sgewbha kiba un shim kum uta u nongmihkhmat paidbah ba shakri ïa ki paidbah katei ka Constituency.
Haba kren ruh ha kane ka sngi, u Damanbait Lamare u la pynpaw ka jingkmen ba ki paidbah ryngkat ki nongïalam ka NPP bad NPYF ki la shim ïa kane ka bynta ban ai burom ïa u kum uta u nongmihkhmat paidbah ka Umroi bad u kyrmen skhem ruh ba kum u nongmihkhmat ba la pynkup bor da ki paidbah un lah ban ai kata kajingshakri kaba paka tam ban myntoi ki paidbah ka Umroi Constituency.
Shuh shuh, u la bynrap ruh da kaba ong kumba ki paidbah ki la pynkup bor ïa u ban shim ïa kane ka lyngkor nongïalam na kane ka Constituency bad na ka liang jong u ruh un ïaleh ban trei kham bha ban wan rah kata ka jingkylla hapoh ka Umroi Constituency ryngkat ka jingkyrshan bad ka jingai bor lang jong ki padbah ka Umroi Constituency hi baroh kawei.
Lyngba jong kane ka sngi la pynphuh pynphieng ruh ïa kane ka jingpynkup burom ïa une u MLA ba thymmai ka Umroi da ki jingshad, ki jingrwai bad ka put ka tem ba la pynkhreh da ki samla, ki longkmie bad ki longkpa napoh ka Umroi Constituency.

Leave A Reply

Your email address will not be published.