Nongpoh, K’Lyngkot, 10: Uwei u nongtrei jong ka Meghalaya Power Transmission Corporation Limited (MePTCL) u la pynkut ïa la ka jong ka jingim da kaba sdien phasi ïalade ha ka 9 tarik mynta u bnai ha ka jaka sah (Quarter) jong ka MePTCL ha Bara Killing, Ri-Bhoi District.
Katkum ka jingtip ba la ïohlum, la ong ba kane ka la jia ha ka por kumba 8:30 baje eiei mynstep ha kaba une u rangbah uba la tip kyrteng kum u Bah Paimon Khongkrom u la sdien phasi ïalade da kaba teh da ka pla ïew bad wah ha jingkhang haduh ba un da khlad noh syndon na kane ka sla pyrthei.
Ki Pulit jong ka Khanapara PS tang shu ïoh jingtip halor kane ka jingjia ki la leit marmar sha ka jaka sah ban pynhiar ïa ka met ryngkat ka jingsakhi lang jong ki bahaiing hasem.
Na ka liang jong ka kurim bad ki bahaiing hasem ki la kyrpad ban ym leh ïa ka Post Mortem namarba kim don kano kano ka jingtharai sniew ïano ïano ruh namarba u Bah Khongkhrom u don ruh ka jingduna ha bor pyrkhat pyrdaiñ bad hadien bala pynlait ïa ka Post Mortem la aiti noh ïa ka met sha ki bahaiing ban pyndep ïa ka jinglehñiam ba khatduh.
