– HT Wells
Shillong,Rymphang 09 : Katba nangmih ki sngi, katta ruh ka BJP ka nangpyrshang ban syng-it ïa u tyllai Hindutva jong ka. Ha ka 30 tarik u Kyllalyngkot ha ka jingkren jong Chief Minister ka Uttar Pradesh, u Yogi Adityanath ha ka jingïalang jong ka “Banjara Kumbh 2023” ha Jamner Jalgaon district, Mumbai, ha kaba ki heh jong ka Rashtriya Swayamsevak Sangh (RSS) ki ïa donlang khrui. U Yogi u ong, “ngi dei ban pynduh noh ïa jingkheiñ jait (caste) bad jingkhñiotbeiñ ha ki thaiñ ki hima (regional discrimination) bad ym dei ban shah ban pyndonkam ïa ki buit sianti ban pynïapait (divisive tactics), tang katta ym don bor ha ka pyrthei ba lah ban khang ïa ka jingïaid shaphrang ka India,u la ong.
Haba u kren shaphang ka jingpynkylla niam,u khyllew ba ka UP ka la dep ban thaw ïa kawei ka Aiñ Anti-conversion kaba pyrkhing bha ha ka snem 2020 bad u ong ba ka jingpynshitom kan long 10 snem da ka set byndi ïa ki briew kiba ïalap ïa kiwei pat ki jait niam bad yn pdiang burom pat ïa kito kiba wanphai na kiwei pat ki niam (Ghar Wapsi) sha ka niam Hindu, khlem jingpynsaja. U kynnoh beit ba don ki briew kiba don da kawei pat ka jingthmu ban pynkylla niam, kiba leh mynleh da ki kam babha ïa ka imlang ka sahlang khnang ban khring ïa ki briew ban kylla niam.U kam ruh ba dei tang kata ka ‘Sanatan dharm’ jong ka niam Hindu kaba lah ban kyntiew ïa ka longbriew manbriew.
Ha ka kotkhubor The Economic Times dangshen, ka report ba ki katto katne ngut ki ’riewijngai (seers) bad ki scholars (riewwadbniah) jong ki Hindu ki la draft haduh kumba 32 page ïa ka Riti “Hindu Rashtra” kaba tyrwa ruh ba yn pynkynriah ïa ka nongbah jong ka ri India na Delhi sha Varanasi, ha kaba ki Muslim bad ki Khristan kin duh noh ïa ka hok ban jied nongmihkhmat (adult franchise) jong ki. Ïa katei ka draft kin sa buh hakhmat jong ka jingïalang Dharma Sansad ha Magh Mela 2023 ha Parayagraj. La shim ïa ka rai ban pynlong ïa ka India kum ka “Hindu Rashtra”; nalor nangta, la don ruh ka jingtyrwa ban tei noh ïa ka Parliament jong ki niam ha Kashi Varanasi, Gujarat. Baroh 543 tylli ki seat dei ban jied sha kata ka ‘Pariliament of Religions’ khnang ban pynduh pyndam noh syndon ïa ki matti jong ka sorkar Bilat.
Nangta, kumba la report, ka jingleh jong ka Janajati Dharma Sanskriti Suraksha Manch (JDSSM) ban tur sha Dispur “Challo Dispur” ha ka 12.02.2023 ban dawa na ka central bad state government ban amend noh ïa ka Art.342-A bad 341 ban pynduh ïa ka hok long Schedule Tribe jong ki khristan, nalor ka jingpan jingkheiñ ïa ka jingdon ki Balang ha Assam bad ka jingthmu ban wan rah ïa ka Uniform Civil Code (UCC) ka ban sa long aiñ shen. Lada phi bishar bniah bha, ka don ka plan ba ïar bha, namar kine baroh ki dei ki jingphah kynshoit da mano re na lyndet ka pyrda lyngba ki jylla ba la synshar da ka BJP khnang ban pynkhih im biang ïa kata ka hindu rashtra (ne ka rukom im hindu) khamtam haba ki ïohi ba ka North East ka long kum ka shrah ba seisoh na ka bynta jong ki.
Ka ri India ka la dep mad ïa ki sohkthang jong u Mahmood Tughlaq halor ka jingthmu jong u ban pynkynriah ïa ka nongbah Delhi sha Devagiri kaba la shu pulom la ka pulom ei.Hato ha kane ka jingthmu pynkynriah ba mynta kan lam shano.
U nongthoh um don jingthmu ban pynrem ne ïaroh party, lada ka state unit jong ka BJP hangne ki dang pynksan ba ka party jong ki kam dei satia kaba pyrshah khristan kumba ba la jia ha kylleng ka India, ka mut ba kim pat sngewthuh ïa ka ideology jong ka namar ynda la wan tyllepb kynsan ka hukum na ka high command jong ki, kim lah ban kyrda. Ka slogan ‘Sabka Saat Sabka Vikas, Sabka Vishwas Sabka Pryas’ (ban kyntiew lang ïa ka ïoh ka kot jong baroh khoit da ka jingseibor bad jingshaniah) ka dei tang ka buit barieh ka ban pynngop ïa kiwei pat ki bym dei hindu.
Hynñiewphew hynriew snem la ïaid ha ka secular India da ka jingstad jong kiba thaw ïa ka Constitution,kam don satia kata ka jingkwah mano mano ruh la kiba long Muslim ne Khristan ban mih noh (secede) na India, te kumno keiñ ki Hindu kin ïohi ba kata ka jingngeit jong kiwei kan dei ka jingpynsyier (threat) ïa ki. Kum ka nuksa, ki missionary haba ki wan ban seng ïa ki skul,ki college ha India,ki pynmih ïa ki khlur ba phyrnai na ka bynta ka India hi,ym na ka bynta jong ki.Lada ki seng ïa ki hospital bad kiwei ka dei pynban ka lad jingïada ha ka koit ka khiah kum ka CMC Vellore, Nazareth Hospital & Dr H.Gordon Roberts Hospital bad kiwei kiwei kiba la ai jingshakri da ki spah snem. Hato tang na ka daw ba kwah palat ka RSS ban pynurlong noh kloi ïa ka agenda Hindutva jong ki, te yn kheiñ synrum lut ïa uei u synñiang u bynhei uba ki khristan ki la leh ban tei ïa ka ri India.Ym tang katta, ka jingwan jong ki Missionary ka wan rah ïa ka roi ka par ha ka longbriew manbriew (human resource) kumno ban pyndonkam ïa u Tyrnem, ka kurat, u prek, lyngka nalor ka pule ka puthi bad kiwei.
Kane ka dei ka mat kaba ki kynhun Khristan ki dei ban ïathir bha lyngba ki seminar, ki symposium, ki brain storming session ne interactive session; wat ap haduh ban da poi ka um haduh ryndang, ïoh ha kata ka por shu hap ban kynrup ruma wat ïa u ‘langïap ruh.Kum ka jingpynkynmaw, ha ka por jong u Nehru la khylliap ïa ka RSS hadien ba u Nathuram Godse u riewshongshit niam hindu u la siat ïap ïa u Mahatma Gandhi ha ka snem 1948. U Union Home Minister Sadar Vallabhbhai Patel ha ka government notification u ong “la khang ïa ka seng Hindu ban pynsuhthied ïa ka kynhun jong ka jingisih bad jingumsnam kaba trei ha ka ri jong ngi bad kaba buh jingma ïa ka jinglaitluid jong ka ri bad kaba pynthohbria ïa ka nam babha jong ka (That the Hindu body was being barred “to root out the forces of hate and violence that are at work in our country and imperil the freedom of the nation and darken her fair name”), bad ka Indira Gandhi pat ka la khylliap thapniang (banned) ïa ka RSS ha ka por Emergency (1975- 1977) bad khatduh hadien ka jingpynjot pynpra ïa ka Babri Masjid ha ka snem 1992 ban lait na ka jingïaleh umsnam hapoh ka ri. Ha ka jaka ban banned noh ïa ka RSS ki nangaisboh pynban. To bishar hi ka party jongno ba thmu ban pynpait pynpra ïa ka jinglong kawei ka Secular India.
