Shillong, Rymphang, 09: U Nongïalam ka seng Congress u Bah Vincent H. Pala ha ka sngi Palei u la ong ba ka party kam ju jied lypa ïa u kyrtong Myntri Rangbah.
“Ha Meghalaya, ngim ju jied lypa ïa u kyrtong Myntri Rangbah. Ynda ki nongthawaiñ ki la shah jied, dei ma ki, ki ban sa rai ïano ban jied Myntri Rangbah,” ong u Bah Pala haba ïakren bad ki lad pathai khubor.
Haba pynpaw ba ka Congress kam kyrduh nongïalam, u Bah Pala u la ong, “ngi don bun ki birew kiba lah ban shimti ïa ka shuki Myntri Rangbah. Ngim ju jied lypa ïa u Myntri Rangbah hynrei ki paidbah kin sa ai ïa ka rai bad ïa u Myntri Rangbah yn sa jied hi da ki nongthawaiñ.”
Ka Congress ka la ngat ha ka jakhom khait hadien ba 17 ngut ki MLA ki la mih noh na ka party bad leit pynïasoh sha kiwei pat ki party.
U Bah Pala u la ong ba kito kiba donkti ha kiba bun ki jyrsieh bamsap kim don shuh mynta hapoh ka sem jong ka seng Congress.
“Kito kiba pyrshah ïa ki Rangbah Shnong bad kito kiba donkti ha ka kam tah sia lieh bad kiwei kiwei kim don shuh hapoh ka party. Mynta, ngi lah ban ong ba ki briew kiba don hapoh ka Congress kim don dak iong bad kim pat ju leh hi ruh ïa kino kino ki kam lane bamsap la ki long ki Myntri Sorkar barim kum u Dr. Celestine Lyngdoh, u Bah Ronnie V. Lyngdoh, u Bah P.N Syiem. Nga nud ban kren sarong ba kito kiba don bynta ha ki jyrsieh bamsam kim don shuh hapoh ka Congress,” u la ong.
U la ong, namarkata, lada ailad ïa ka Congress kan pynthikna ba ka Meghalay kan ïoh ïa ka Sorkar kaba lait na ka bamsap.
