Sangah u Dr. Aman War ba pynlong ishu politic ka AITC ïa ka khlam COVID

Shillong, Rymphang, 09: U kyrtong jong ka United Democratic Party na North Shillong Constituency u Dr. Aman War ha ka sngi Palei u la sangah tyngeh ïa ka All India Trinamool Congress kaba la pynlong ishu politik ïa ka jingpang COVID da kaba pynbudnam sniew ïa ki briew kiba la ïarap ïa ki parabriew ha ka por ba kane ka jingpang ka la wan lynshop ha kane ka jylla.
U Dr. War uba long u Director of Health Services (Medical InstituteI) barim u la pynmih ïa kane ka jingkynthoh halor ka jingkren jong ka State General Secretary ka TMC Women’s Wing ka Kong Noor Warjri.
Ka Kong Warjri ka la kynnoh ba u Dr. WAr u la kam ba um don jingtip eiei shaphang ka jinglut jingsep ha kaba ïadei bad ka jingïakhun thma pyrshah ïa ka jingpang COVID kaba kot palat T. 800 klur.
Haba kob ïatai nia bad ka Kong Warjri halor kane ka mat, u Dr. War u la ong, “ban shu kren ïa kaei kaba shu ïoh pateng na kiwei kam ïarap eiei. Hynrei lada ka Kong Warjri ka kloi ban ïatainia halor kane mat, nga long uba kloi, la ka long ha kano kano ka por, ha kano kano ka jaka.”
U Dr. War u la ong ba ka jingkynnoh jong ka Warjri ba u leh mynleh kumba um don jingtip eiei shaphang ka jingpynlut pynsep ha kaba ïadei bad ka jingpang ka long ka bym don nongrim namarba ka dei tang ka buit lehkai jong ka TMC.
“Ka Kong Warjri ka ong ba nga shu leh mynleh ba ngam don jingtip eiei shaphang ka Bill, ka dei tang ka jingkynnoh bym don nongrim,” u la bynrap.
Haba kyntu ïa kane ka nongïalam jong ka TMC ban shim nuksa na ka rep ‘bura’ u Dr. War u la ong, “ka jingrep bura ka pynjulor ïa ka mariang namarba ki briew ki phet na kawei na ka jaka sha kawei pat, na kawei ka party sha kawei pat ka party, ki iehnoh shadien tang ïa ki jingjulor. Te, kum kine ki briew shwa ba kin pynmih ïa kino kino jingkynnoh nynkong eh kan bha ban kin peit shwa ïa ka kyrpong ing lajong, nangta ki sa bishar sa ïa ka kamra shongkai.”
“Kum kine ki jait jingkren, ngi ïapeit hadien ka 2 tarik, Lber, la ngi lah ban ïadon bynta lang bad kum kine ki jaitbriew ha ka sorkar,” u la bynrap.
U DHS (MI) barim u la ïai ban shuh shuh ba ka Directorate jong u ka la pynlut tang T. 248 klur na ka bynta ka jingïakhun thma pyrshah ïa ka jingpang COVID tad haduh ka por ba u la shongthait na ka kam sorkar.
Da kaba pynpaw ba ka pisa kaba la pynlut baroh ha kaba ïadei bad u COVID kam shym la wan satia na ka DHS (MI), u Dr War u la ong, “na kata ka daw nga ong ba ngam tip eiei kumno ki pynlut ïa ka pisa kaba sah kaba kot haduh T.800 klur tam.”
Haba kdew ruh ïa ka kyntien kaba ong, ‘ka jingduna jingtip ka long kaba mynsaw’ u la ong, “haba phi kren shaphang ka ishu, phi dei ban da tip, phi dei ban don ïa ki jingshisha bad phi. Lymda phi don ïa ki jingshisha ban shu ong kumno baroh ki Bill ba ladep pyllait lyngba ka DHS, kam long kumta.”
“Lada baroh ki bill ladep pyllait lyngba ka DHS, ngin jin da la ïathuh haduh katno ngut la pynlut bad nga ladep ai ïa ka dor kaba dei. Ki lah ban pan jingtip ha kano kano ka por namarba ladep rah ruh hapoh ka Iingdorbar Thawaiñ ka Jylla la bun sien. Nga tharai ka dei u Nailur jong u snem baladep, ha kaba kane ka jingkylli ka la mih sa shisien ha Ingdorbar Thawaiñ ngam shym la don shuh ha ka kam,” u la ong bad bynrap, “namarkata, nga ieng halor ka jingkren ka jong nga ba ka jingpynlut ka dei kaba nga la dep ïathuh bad ïa kaba pisa kaba sah ngam don jingtip eiei shaphang kata.”
U la ong shuh shuh ba ki briew kiba la pynlut haduh T.803 klur kin kham tip kham bha ban ai jubab halor kane ka kam. “Haba nga kren ïa kane, kam mut ba ka don ka jingbym biang halor ki jingpynlut pynsep,” ong u Dr. War.
U la ïathuh ruh ba ka don ka pisa kaba la pyllait sha ki MLA ha kaba sdang jong ka jingpang khlam COVID ha ka jylla.
“Namarkata, kane ka ruh kan paw ha ka jingpynlut kaba kot T.803 klur hynrei ngam tip namarba kam shym la ïaid lyngba jong nga. Nga tharai ki paidbah ki long kiba laitluid ban kylli na ka bynta ban ïoh jingtip na ki MLA jong ki kumno ki pynlut ïa ka pisa ba la pyllait da ka Sorkar khamtam ha kaba ïadei bad u COVID-19. Kiwei kiwei ki jingpynlut, lada don kino kino, na kiwei ki tnat kum ka NHM, kiwei pat ki Directorate, kim shym la ïaid lyngba jong nga kum u DHS (MI) ha kata ka por,” u la ong.
Halor ka jingpynlong ishu politik ka TMC ïa ka jingpang COVID, u Dr. War, u la ong, “ki (TMC) pyrshang ban pynlong politik ïa kane ka kam, ki pyrshang ban pynhiar dor ïa nga kum u Director bad ki pyrshang ban pynjngut ïa ka dur jong kiwei kiwei ki nongïalam kiba ïakhun ïa kane ka elekshon kum u Bah Michael Kharsyntiew, uba long uwei na ki khyndiat ngut ki briew kiba la mih shakhmat ban tyrwa jingïarap ïa ka DHS ha kato ka por haba ka jylla baroh kawei ka dang shah lynshop ha ka jingpang khlam. U dei uwei napdeng kiba la wan shakhmat ban ïaroh namarba u la ïoh jingïarap na shabar, u kwah ban ïasam lang bad ngi la kyrpad ïa u ban leit lyngba ka ophis DC bad kata ruh u la leh.”
U la ong ka burom dei ban ai sha kiwei ruh kiba la sam ïa ki marbam sha ki paidbah kiba donkam jingïarap ha ka jaka ban kynthoh pyrshah ïa ki bad ha ka jaka ban lorni na jingkhangiit haba kine ki jingjia ki la jia.
Haba buh jingkylli ïa ki nongïalam ka TMC kaei kaba ki leh haba ki paidbah ki la mad jynjar ha ka por ba la lynshop ka khlam COVID, u Dr. War u la ong, “ki shong khop hapoh iing katba ma ngi pat ngi trei kum ki shipai ïakhun COVID ban ïarap ïa ki parabriew bad kum kine ki jaitbriew ngam pat ju ïohsngew ha ka por COVID ba kan mih shakhmat ban ïarap ïa ki parabriew. Lehse ka shu peittuh na ka jingkhangiit bad ïohi ïa ki jait pa ki jait kali kiba wan bad ban sam jingbam, lehse ki kali ba don nombar ML-01, ML-02, ML04 lane lah ban dei ka ML-03 ne katba ka dei hynrei dei kine ki briew kiba la ïarap bad phi pyrshang pynban ban pynjngut ïa ka dur jong ki. Phi pyrshang ban tan shapoh tang namarba ki ïarap ïa ki parabriew,”
Ïa kane ka jingkynthoh jong ka TMC, une u kyrtong ka UDP u la ong, “kaei kaba ki kwah, ïa kata hi kin sa ïoh.”