Ki khynnah ki shah pynduh ïa ka hok pule hapoh ka jingsynshar ka sorkar MDA, kynnoh u Dr. Mukul

0

Shillong, Rymphang, 09: U nongïalam jong ka Meghalaya Trinamool Congress u Mukul Sangma ha ka sngi Palei u la ïashim bynta ha ki ar tylli ki jingïalang paidbah kiba la long ha Bajengdoba bad ha Mendipathar, North Garo Hills.
Haba kren ha ka jingïalang ha madan Achotchonggre ha Bajengdoba, u Mukul Sangma ula ong ba kan long ka sien banyngkong eh ha ka ri, ka Sorkar Meghalaya ka la phiel ban thung ïa ki nonghikai, kaba lam sha ka jingshah pynduh ki khynnah ban ïoh ïa ka hok pule puthi.
“Ki khynnah na baroh ki thaiñ-Khasi, Jaintia, bad Garo Hills- ki shu shong duh jingkyrmen na ka daw ki jingleh jong ka Sorkar. Kane ka la poi haduh u pud ba ki skul ki la hap ban shu khang khyrdep ha kiba bun ki shnong ha ka jylla jong ngi. Kane ka dei ruh ka jingpyrshang ban khanglad ïa ki khun jong ngi ban ïoh ïa ki jingnang jingtip da kaba pynduhlad ïa ka jingangnud ba kordor jong ki. Ka dei ka jingkitkhlieh jong ngi ban ïakhun pyrshah ïa kine ki rukom pyrkhat,” ong u Sangma.
U Sangma u la kynnoh ruh ba ka Sorkar MDA ba ïalam da ka NPP ka la thaw ïa ka histori da kaba kyntait ban thungkam ïa ki nonghikai.
“Ha ka por ba nga dang bat ïa u lakam synshar, bun ki lad jingmyntoi ngi la pynsdang ban pynmyntoi ïa ki paidbah ha ka imlang ka sahlang. Nga la wanrah pisa na World Bank, na ka Asian Bank, na ka JICA, bad na kiwei kiwei ki shlem nabar ka ri. Watla ka sorkar ka la don ïa ki lad ban pyndap ïa ki kam ba thylli, ki la leh bym suidñiew ban plie lad ïa ki samla. Na ka bynta jongno la shu tyngkai ïa kine ki kam kiba thylli? Namarkata, ngi donkam ïa ka jingkylla. Ngi dei ban pynthikna lada ngi wan ha ka bor ngin pynurlong ïa kaba ki paidbah ka Meghalaya ki dei hok ban ïohi,” la ong u Mukul Sangma.
Haba kren shaphang ka jinghiran ka khih ka kamai na ka daw ka jingbym suidñiew jong ka Sorkar MDA ba ïalam da u Conrad Sangma ïa la ka kamram, u Nongïalam ka Liang Pyrshah u la ong, “ka don ka thong ban pynbha ïa ki jingtei ha rilum Garo. Ki paidbah kim don pisa ha ka kti bad ki la shah pynbor ban pan kylliang na ki bahaing hasem wat ha ka por ba ki la ïakynduh jingeh ha ka pang ka shitom. Ki khynnah kiba proh ha ka imlang sahlang ki la ïakynduh mawsiang ban pynurlong ïa ka jingangnud jong ki na ka daw ka jingbym don ka College bad ka University kiba bha. Dang shen, nga la wnarah ïa ka skhim kaba pynkup bor ïa ki kynthei ban ai jingïarap T. 5,000 ban plie ïa ka Bank Account. Ïa ka pisa ngi la sam hok hynrei naduh ba la pynkylla ïa ka sorkar, la shu pynsangeh.”
Ha kawei pat ka jingïalang kaba la long ha Mendipathar, u Mukul Sangma ula maham ïa ki paidbah ka Meghalaya ban long kiba peitngor ïa ki ‘jingthmu barieh’ jong ka BJP. “Hadien ka jingïoh ïa ka jinglaitluid, bun tylli ki aiñ la mynjur ha kiba bun ki jylla ban pynrung ïa ki kyndon kynthup ruh ïa ka Sixth Schedule ha Meghalaya, ka Article 371 ha Nagaland bad ka Article 370 ha Jammu & Kashmir. Kine ki aiñ la ai ban ïada bad ban pynneh pynsah ïa ka kolshor bad ïa ka jingim. Hynrei, kaei kaba la jia ïa ka Article 370 ha Kashmir?”
Da kaba pynpaw ïa ka jingsngewkhia ïa ki paidbah, u Sangma u la ong, “ka Sorkar Pdeng ka shong ha Delhi ban pyndam ïa ka Article 370 khnang ban pynurlong ïa ki jingthmu jong ka. Kane ka Article ka long ka atiar jong ki riewlum ban pynneh pynsah ïa ka khyndew namarba ka ïada da ka aiñ ïa ki briew kiba nabar ban thied jaka ha ka jylla. Ka Sorkar BJP ba ïalam da u Modi ka la trei pyrshah ïa ka mon jong ki paidbah. Bun na ki nongïalam na Kashmir kynthup ïa ki Myntri Rangbah barim ki la shah kem. Ngi dei ban ïatylli lang kawei bad ban peitngor ïa kum kine ki kam bymman.”
“Hato u Myntri Rangbah Conrad Sangma u shlur ban ieng pyrshah ïa ka BJP? Ki paidbah ka jylla jong ngi ki la wan lang kawei da kaba ïatylli lang kawei. Ban ïakhun pyrshah ïa ka ka jinglong kynsha jong kine ki party, ngi dei ban ïatylli bad ban trei na ka bynta ka bha ka miat jong ki paidbah. Ki trei ban phiah arliang ïa ngi da kaba pynap shrip. Ka BJP ka wan sha kane ka jylla jong ngi da ka jingthmu barieh. Lei bad peit kaei kaba la jia ha Assam bad kumno ki briew ki la shah leh. Katba ka BJP ka kren shaphang ki kam pynroi hangne, shen lane hadien, kin sa pyntreikam ïa ki buit barieh, kumba ki la leh ha kiwei pat ki jylla,” la ong u Sangma.

Leave A Reply

Your email address will not be published.