Shillong, Rymphang, 9: Sa khatsan ngut ki briew ki la shahkem ha kaba ïadei bad ka huri hura kaba la jia ha ka shnong Charbatapara, ong u Chief Electoral Officer (CEO) u Bah F.R Kharkongor ha ka sngi Palei.
U la ong ba haduh mynta, 31 ngut ki briew ki la shah kem halor ka jingdonkti ha kane ka jingjia.
“Ka jingkhynra ka dang ïai bteng ha kiba bun ki jaka,” ong u Bah Kharkongor.
Ha ka miet sngi Baar, ka kynhun jong ki nongkyrshan ka AITC bad ka NPP ki la ïa huri hura ha ka shnong Charbatapara kaba hap hapoh ka Phulbari Constituency, West Garo Hills.
Ha ka sngi Balang, 16 ngut ki briew ki la shah rah ha ki Pulit.
U Bah Kharkongor ha kine ki khyndiat sngi u la ïathuh, na ki 131 ngut ki briew kiba la shah jer kyrteng, 25 ngut ki la shah khot ha ki Pulit. Kiba sah na kine, kin sa shah khot ha ki Pulit khnang ban ïada na kino kino ki jingjia ha ki sngi ban sa wan.
La pynlong ruh ïa ka jingïaid flag march da ki bor pahara ha ka sngi Balang ban pyni ïa ka jingdonbor jong ka aiñ.
“Baroh ki nongthaw jingkulmar kin shah pynoi ïa ka soskular ba kin leh tip sngi. Ki bor bahalor ki la peitngor bha halor kane ka jingjia,” ong u Bah Kharkongor.
