Mudui ejahar u Bah Adelbert Nongrum halor ka jingkynnoh pyndonkam bakla ïa ka pisa COVID
Shillong, Rymphang, 09: U MLA barim ka North Shillong Constituency u Bah Adelbert Nongrum ha ka sngi Palei u la mudui da ka ejahar halor ka jingkynnoh ba ka don ka jingpyndonkam bakla ïa ka pisa ba la bhah da ka Sorkar Pdeng na ka bynta ban ïakhun pyrshah ïa ka jingpang COVID-19 ha kane ka jylla.
Une u kyrtong jong ka Voice of the People Party (VPP) ha ka ejahar ba la aiti ha Sadar Police Station u la kyrpad ïa ki Pulit ba kin pynlong da ka jingtohkit halor kane ka kam.
U la ong ba ka don ka jingïapher hapdeng ka jingai jingkheiñ hapoh ka Meghalaya Legislative Assembly bad ka jingkheiñ ba la lap lyngba ka jubab RTI ha kaba ïadei bad ka pisa ba la pyllait na ka sorkar pdeng na ka bynta ki kam ïakhun Covid-19.
“Nga sheptieng ba kine ki jingïapher ha ka jingkheiñ ba la pynbna ha kaba ïadei bad ka jingpynlut na ka pisa ba la bhah da ka Sorkar Pdeng halor ki kam ïada Covid-19 ha Meghalaya ka lah ban dei ka jinglute lane ka jingpyndonkam bakla ïa ka pisa u paidbah, kaba long be-aiñ hapoh ka IPC…………” ong une u MLA barim.
U la ïathuh ba ha ka jubab jong u Myntri ka Koit ka Khiah hapoh ka dorbar synrai jong ka Iingdorbar Thawaiñ halor ka jingkylli ba la rah ha ka 12 tarik, Nailur, 2022 ha kaba ïadei bad ka pisa ba la pynlut halor ka khlam Covid-19 haduh mynta na ka Sorkar Pdeng ka long tang T. 76.56 klur.
Hynrei, ka jingtip ba la ïohpdiang lyngba ka RTI da u Bah Disparsing Rani na ka CPO, NHM Finance Division, Ministry of Health and Family Welfare ka pynpaw ba ka Sorkar Pdeng ka la pyllait jingïarap pisa lyngba ka NHM hapoh ka India Covid-19 Emergency Response and Health Systems Preparedness Package na ka bynta ka jylla Meghalaya ka long T. 15.61 klur hapoh ka wat kaba nyngkong (Phase-I) bad T. 104.12 klur hapoh ka wat kaba ar (Phase-II).
“Ngam don jingtip shaphang ki kam ïakhun Covid-19 kiba dang bteng ha ka jylla hadien ka 12 tarik, Nailur, 2022. Namarkata, kum u nongshong shnong uba don jingkitkhlieh ka dei ka kamram jong nga ban buh jingkylli haduh katno ka pisa kaba ïoh na ka sorkar pdeng la pynlut ha ka jingïakhun Covid-19 ha Meghalaya ba la pynbna paidbah ha ka ingdorbar thawaiñ na ka jingai jingkheiñ ba la pynbna da ka Ministry of Health and Family Welfare, ka Sorkar India, New Delhi,” Nongrum la ong u Bah Nongrum ha ka ejahar.