Ka BJP kam dei kaba pyrshah ïa ki Khristan, hynrei ka pyrshah ïa ka bamsap: Bernard Marak

0

Shillong, Rymphang, 09: U nongïalam jong ka BJP u Bernard N Marak uba long ruh u MDC jong ka Tura u la ong ka BJP kam dei kaba pyrshah ïa ki Khristan lane ïa kano kano ka niam hynrei ka dei kaba pyrshah ïa ka bamsap kum u Khristan ba shisha.
Ha u kyrwoh, u Marak u la ong ba ka Meghalaya ka dei ka jylla kaba bun ki Khristan bad baroh ki kyrtong ïakhun elekshon ki dei ki Khristan.
“Hato kane ka mut ba kine ki kyrtong baroh ki dei kiba pyrshah ïa ki Khristan? Lada ki kyrtong ka BJP ki jop ïa ka elekshon, kan long ka jingkyrkhu ïa ki Khritan bad ki MLA ka BJP kin ïai long kiba hakhamt eh ba ïada, ban pynneh pynsah bad ban kren ïa ki ishu jong ki Khristan hakhmat ka Sorkar Pdeng,” u la ong.
U la ong, ba ka Manifesto jong ka BJP ka ailad markatjuh sha baroh ki jaidbynriew la ka long ha ka jait, ka niam, ka kolshor, ka jaidbynriew. Dei hapoh kane ka nongrim ba ka party ka lah ban poi sha manla uwei pa uwei, sha manla u nongthep vote, sha baroh ki paidbah hapoh ka imlang ka sahlang.
U la ong ba ki prokram bad ki jingthmu jong ka Sorkar BJP ha Delhi la saiñdur ban peit ïa baroh ki nongshong shnong jong ka ri, ki nongshong shnong ka jylla, ha ki sor bad nongkyndong.
Ha kaba ïadei bad kane, ka Sorkar BJP ka la lah ban ïoh ïa ka jingjop ha baroh ki liang bad baroh ki prokram khamtam ki kam pynroi na ka bynta kiba duk bad ki jaidbynriew kiba sahdien.
Halor ka jingkynnoh ba ka BJP ka dei kaba long pyrshah ïa ki Khristan, u Marak u la ong ba ym don nongrim ban teipop ïa ka BJP halor kane.
U la ong ba kawei ka nuksa lah ban pynshai, ha kaba ngi don ïa ka sorkar BJP ha Nagaland ka Jylla kaba kham bun ki Khristan. “Ym don hangno hangto ban ïohi lane ba ki paidbah jong ka jylla Nagaland kin mad ïa ki jingshah thombor haba ïa ka Sorkar la pynïaid da ka BJP. Ka pynti ba ka party kam ju tuklar ïa ka rukom im, ka kolshor kaba kynthup naduh ka rukom bam jong ki paidbah ha Nagaland,” ong une u nongïalam ka BJP.
“Ha ka jingshisha, ka Sorkar India ka la ai bun ki projek lyngba ka Ministry of Minority Affairs. Ha Meghalaya, ka BJP ka dei ka party kaba ïatreilang hapoh ka sorkar MDA,” ula bynrap.
Katkum ka jingong jong u, dei lyngba ki nongtrei jong ka BJP ha ka jylla kaba long shibynta jong ka sorkar ka la ïarap ïa ka jylla ban ïoh bun ki projek na ka Sorkar Pdeng. Ïa kine ki projek bad ki skhim la sam hok khlem da leh shiliang. Ym pat ju don kino kino kiba ïoh bhah ki ban shah kylli shaphang ka niam haba ki ïoh ïa ki lad jingïarap na ki skhim.

 

Leave A Reply

Your email address will not be published.