Sdang mih pyrthei ki kyrtong, sdang bunkam ki MLA

Ka por ka la dei ïa ki paidbah nongshong shnong ka jylla ba kim dei satia ban shu shah pynbiej ha ki ktien jali jaum jong ki nongïalap elekshon hynrei ban da peit bad bishar bha kaei kaba u nongmihkhmat jong ki u la leh ha ki san snem ym dei eh tang na bynta ka jingmyntoi shimet jong ki hynrei na ka bynta ka jingmyntoi jong ka shnong ka thaw, ka thaiñ bad ha ka constituency hi baroh kawei.
Kane kadei ruh ka por ba ki kyrtong ki sdang ban mih pyrthei ryngkat ki kyntien kiba lah ban pynbiej ïa ki paidbah nongthep vote. Lah ruh ban ong ba dei lyngba ka jingtbit jong ki kyrtong ba thymmai ba bun ki kyrtong ba rim ki khyllem noh lah ban ong ba dei namar ka jingbym lah jong ki ban ai jingkhein lane lah ruh ban dei ba kim ïa kotbor lane kim lah ruh trei ne pynhun ïa kaei kaba ki la kular ha ki paidbah ha ki san snem mynshwa.
Tad haduh mynta hi ka elekshon Meghalaya ka shongshit beit tang ha ki nongïalam jong kito ki party ne jong ki kyrtong bad ha kaba kut hi dei ma ki kiba tai ïa ka lawei jong ki nongthep vote. Lada tbit ma ki ban pynkohnguh ïa ki paidbah, tang katta uto u kyrtong ba ki kyrshan u la jop bad lada kim trei bha ma ki tang katta hi ki la liem noh.
Dei ruh ha kum kane ka por ba ki nongthep vote ki pynap shibun ki jingkylli na bynta u MLA ha shwa ba kin leit biang ban jied ïa u MLA uba thymmai ha u 2023. Dei ruh ha kum kane ka samoi ba ki paidbah ki ïoh ban pyrkhat bad bishar bniah namar bun kiwei pat ki kyrtong kin wan ban pynshai ne ban kular ha khmat jong ki ïa ka thong kaba ki kwah ban trei lada ki jop kum u MLA jong ki.
Bunsien hi ka jingrem noh jong ki MLA tang hadien shi samoi ba ki jop kadei namar ka jingkular jong ki bad ka kam kaba ki trei kam ïahap satia. Don ruh ki MLA kiba la mad noh ïa ka jingshah rem tang namar ba ynda ki la jop ki la kiar wat ban kynduh ïa ki nongthep vote khamtam eh ïa ki nongkyrshan la jong. Ka daw kaba hakhmat kaba ju long ka daw rem ïa ki kadei ba kaei kaba ki kular ha shwa ka elekshon kam ïahap wat tang shi pawa na kaba ki pyndep. Ka jingmih jong ki nongïalam ban leit kyrshan sha kiwei pat ki kyrtong ba thymmai ynda la jan ka elekshon ruh kadei ka dawbah kaba pynrem ïa ki.
Hynrei ha kawei pat ka liang, don ki nongmihkhmat kiba trei shisha na ka bynta ki paidbah nongthep vote hynrei tang namar ki klet noh ban burom ïa ki nongïalam, ynda la dei ka por ban jied biang ïa ki nongmihkhmat, bun ki shah pynbiej noh ha kiwei ki kyrtong. Ym lah ban len ba ki don ki nongïalam kiba lah ban pynkohnguh ïa ki spah ngut ki nongkyrshan ruh ha ka por elekshon bad kane hi kadei kaba ktah bha ïa ki kyrtong lada jia ba kim lah ban pynhun ne pynbiang ïa kum kitei ki nongïalam.
Ka saiñpyrthei hi ha Meghalaya ka pher bha bad la ju ïohi ruh ba man ka san snem kumba 20 haduh 30 ngut ki MLA ki ju shah rem bad mih bujli da kiba thymmai. Katkum ka jingïohi kane ka lah ban dei ruh na ka rukom sam ne pynpoi ïa ki skim kam pynroi sha ki shnong ki thaw ne ki iing ki sem. Ki nongïalam jong ki unit bapher bapher kim dei satia ban shaniah tylli tang ha iwei ne ar tylli ki nongïalam hynrei ban da don ki briew kiba peit pyrman man la ki unit khnang ba ki kam pynroi kin ym poi tang ha ki bahaiing jong ki nongkitkam jong ki unit. Kane ka ju jia beit ha man la ki constituency bad kane hi kadei ka daw kaba hakhmat eh kaba u MLA um ju tip ei ei ïa kaei kaba ki nongkitkam ki leh hynrei ha kaba khatduh dei ma u ba mad ïa ka jingshah rem.
Ka por mynta ka la ih bha ruh na ka bynta ki kynhun kiba ju wad jingtip lyngba ka RTI ban tip ïa ki kam pynroi kiba poi ha ki shnong ki thaw. Kito ki kynhun kiba smat ban wad ïa kum kitei ki jingtip ki dei ruh ban da wad bniah hato kiba ïoh ïa kitei ki skim kam pynroi na u nongmihkhmat kidei kiba dei hok shisha ban ïoh ne dei pynban da ki bahaiing suda jong ki nongkitkam ha ki shnong ki thaw. Lada ki lap ba kadei pynban ka skim tang na ka bynta ki bahaiing ki dei ban pynshai paidbah khnang ba kiba bun balang kin tip bad kin ïoh ruh ban rai ha ka por thep vote.