Haduh 8 wiket pynliem ka Meghalaya ïa ka Jammu bad Kashmir ha jingïakhun sdang

Syed Mushtaq Ali Trophy T20

0

Shillong, Risaw 11 : Ka kynhun ïalehkai jong ka Meghalaya ka la ïoh ban pynliem haduh phra wiket ïa ka Jammu & Kashmir ha ka jingïakhun sdang jong ka Syed Mushtaq Ali Trophy T20 Tournament kaba long ha Mohali hynne ka sngi.
Ïa ka jingïakhun ha katei ka sngi la hap ban pynïakhuh da mar 9 over na ka daw ka jingpynthut ki bor ka mariang ha kaba ka Meghalaya ka la jied ban kawang nyngkong.
Haba beh ïa ka thong kaba 82 ron ban jop, ka Meghalaya ka la duh noh ïa u Raj Biswa khlem ïoh kamai ron bad u Chiraq pat da tang ar ron. Hynrei dei hadien ka jingwan jong u Punit Singh Bisht u wei na ki nongïalehkai ba wan ïarap ïa ka kynhun ba ka Meghalaya ba ka jingïakhun ka la nang itynnad shuh shuh namar u ïoh ban kamai haduh 51 ron na ki 23 ball.
Ym tang katta, utei u rangïalehkai u la ïoh ruh ban khyrwit haduh hynriew tylli ki saw ron bad ar tylli ki hynriew ron da kaba ïalehkai lang bad u Lerry Sangma uba la neh ban kamai haduh 23 ron na ki 13 tylli ki boll kynthup ïa ar tylli ki saw ron bad kawei ka hynriew ron. Dei lyngba ka jingïalehkai bha jong kitei ki arngut ba ki la lah ban kamai lang haduh 59 ron.
Shwa kane, ka kynhun jong ka Jammu & Kashmir ka la ïoh ban kamai tang 81 ron da ki lai wiket ha kaba u Khurana, Dippu Ch Sangma bad u Abhishek Kumar ki la ïoh ban khur mar shi wiket.
Ka jingïakhun kaba bud na bynta ka Meghalya kan long pyrshah ïa ka Haryana lashai ka sngi. Katei ka kynhun ka la ïoh ban pynliem da tang shi ron ïa ka Services hynne ka sngi.
Ka kynhun jong ka Meghalaya ki kynthup ia u Raj Biswa, Kishan Lyngdoh, Rohit Shah, Punit Singh Bisht (guest professional), Dippu Ch Sangma, Chirag Khurana (guest professional), Rajesh Bishnoi (guest professional), Lerry G Sangma, Yogesh Tiwari, Anish Charak, Kilco Marak, Abhishek Kumar, Riboklang Hynniewta, Swarajeet Das, Chengkam Sangma.
Hadien ba la dep ban ïakhun pyrshah ïa ka Haryana ha ka 12tarik, ka Meghalaya kan hap pat ban ïakhun pyrshah ïa ka Karnataka ha ka 14tarik, Maharashtra ha ka 16tarik, Services ha ka 18tarik, Arunachal Pradesh ha ka 20tarik bad Kerala pat ha ka 20tarik mynta u bnai.

Leave A Reply

Your email address will not be published.