Sdang ka Treilang Inter Village Development ha Patharkhmah ban pynkhlaiñ ïa ka roi ka par ki shnong
Nongpoh, Jymmang 21: Ka ophis jong u Sub-Divisional Officer (Civil), Patharkhmah Civil Sub-Division mynta ka sngi ka la paidbah ïa ka “Treilang 2026, Inter-Village Development Championship”, ka jingïakob hapdeng ki shnong shnong ban pynkhlaiñ ïa ka jingïatylli, jingïatreilang bad jingïadei paralok hapdeng ki paidbah shnong jong ka thaiñ Patharkhmah ha Ri-Bhoi District khamtam ban kyntiew ïaka roi ka par.
Ïa ka prokram sdang la pynlong ha Patharkhmah Model Degree College ha kaba ki nongïalam shnong, ki samla pule bad ki paidbah nong shong shnong ki la wan ban shim bynta shitrhem ha kane ka sngi kaba long ruh kum ka jingïasnohkti lang ban kyntiew ïa ka roi ka par lyngba ki jingïalehkai, jingïakob bad ki prokram bapher bapher.
Ha kane ka sngi u Abhilash Baranwal, Deputy Commissioner ka Ri-Bhoi District, u la shim bynta kum u kongsa ha ryngkat ka jingdonlang jong u Chaitanya Awasthi, SDO ka Patharkhmah Civil Sub-Division, u Dr. P Hajong, BDO ka Jirang Block, u Bah R. Marwein, Officer-in-Charge ka Patharkhmah Police Station, u Bah Petal Thangkiew, Rangbah Shnong ka Patharkhmah lem bad kiwei kiwei ki riew rangbah.
Ka “Treilang 2026” kan sdang naduh une u bnai Jymmang bad kan bteng haduh u Naiwieng mynta u snem, ha kaba yn pynlong bun jait ki jingïakob kiba kynthup ïa ki jingïalehkai sports bapher bapher jingïakob rwai bad shad, lem bad shibun kiwei pat ki prokram ki ban wanrah ïa ka jingïatylli ki shnong.
Ha kane kajuh ka sngi, ka ophis jong u SDO Patharkhmah Civil Sub-Division bad ka ophis jong u BDO ka Jirang Block ki la pynkup burom ruh ïa u Abhilash Baranwal, halor ka jingshakri kaba u la noh synñiang kum u Deputy Commissioner ka Ri-Bhoi District, hashwa ba un mih noh na Ri-Bhoi ban leit shimti ïa ka kam kum u Deputy Commissioner bathymmai jong ka East Khasi Hills District.
Shuh shuh, ha ka por mynstep jong kane ka sngi, ki samla pule jong ka Patharkhmah Model Degree College ki la pynlong ruh ïa ka jingïaid paidbah ha sor Patharkhmah ban pynsngew paidbah halor ka jingma kaba mih na ka jingdih duma bad ban ai jingpynshai ïa ka jingdonkam ban kiar na kine ki jingmlien kiba ktah ïa ka koit ka khiah.