Man ka elekshon ki don beit ba ïakhun pyrshah ngam donkam ban da khot kyrpang – Bah S Dhar

Shillong, Jymmang 21 : U MLA ka Nartiang ba dei ruh u Symbud Myntri Rangbah ka Jylla Bah Sniawbhalang Dhar ha ka sngi Palei u la ong ba man ki elekshon ki don beit ki kyrtong na ki party bapher bapher kiba ju mih ban ïakhun pyrshah ïa u kumta ha kane ka elekshon ruh um donkam ban da khot kyrpang ïa kino kino ki kyrtong ban wan ïakhun pyrshah ïa u.
“Ngam da donkam ban da khot kyrpang ïano ïano ban wan ïakhun pyrshah ïanga na Nartiang ha ka elekshon ban wan, kiba kwah ban ïakhun ki lah ban wan da ka mon laitluid,” u la ong.
Kane ka jingkren jong u Bah Sniawbhalang kadei hadien ba ka la phriang ki khubor ba uwei na ki nongïalam jong kawei ka seng sainpyrthei u pynpaw ba u kwah ban leit ïakhun na katei ka constituency.
Shuh shuh u Bah Sniawbhalang u la ïathuh ba ki paidbah nongthep vote ka Nartiang ki dei ki briew kiba la stad bad shemphang bha bad dei na kane ka daw mynta la saw sien ki la pynjop ïa u kum u MLA jong katei ka thain. “Ki dei ki nongthep vote kiba shemphang bad ki la pynjop ruh ïanga haduh saw sien ym kum kiwei ki jaka ba ki pynkylla nongmihkhmat man la ka por,” u la bynrap shuh shuh.