Shillong, Ïaïong 14: Ka jingpykhat ban pynlong ïa ka nongbah Shillong kaba khuid kaba suba ka la sdang ban urlong ha kaba la ïohi ba ka Shillong Municipal Board ka la shim ïa ka sien jam kaba kham bha ban pynioh ïa ka Shillong kaba khuid da kaba bat thung shibun ki briew ban trei sngi ban pynkhuid ïa ki jaka kiba hab hapoh ka jingpeit jong ka Shillong Municipal Board.
Ka khubor ka ïathuh ba mynta u bnai ka SMB ka la thung thymmai jan shispah ngut ki briew ban shu trei contract ban pynkhuid ïa ka sor Shillong ha ki jaka kiba hap hapoh jong ka jingpeit ka SMB, kane ka jingpynkhuid ka long khamtam eh ïa ki suok bad ki jaka ïew kaba ju ïaid bad pyndonkam bha da ki paidbah.
Shuh shuh ka khubor ka ïathuh ba ka Shillong Municipal Board mynta ka la bthah ïa ki nongtrei ba kin pynkhuid lai sien shi sngi ban pynthikna ba ki lynti syngkien bad ki surok khamtam eh ki sawdong sawkun ka Khyndailad bad ka Motphran, kine ki jaka ba don ki ïew kaba long ruh kum shi bynta ban pynlong ia ka nongbah Shillong kaba khuid ba suba.
