Plie u MLA ka Umroi ïaka Sub Centre haka shnong Nongtraw, ka jingkyrkhu ïaki 8 tylli ki shnong

Nongpoh, Ïaiong 14: U MLA ka Umroi u Bah Damanbait Lamare mynta ka sngi u la plie paidbah ïaka Sub Center haka shnong Nongtraw ka ban peit bad khmih ïa kumba 8 tylli ki shnong ha katei ka thaiñ, bala tei haka jinglut kumba T.55 Lakh da ka VHC Nongtraw.
La sakhi ruh ha katei ka sngi ka jingplie ïa katei ka Sub Centre da ka jingdonlang ka kong A Kharduid DMHO ka Ri-Bhoi District, u Bah Robert Dympep Rangbah Shnong ka Nongtraw, ki nongtrei ka tnad ka koit ka khiah lem bad kiwei kiwei ki riew rangbah.
Kitei ki 8 tylli ki shnong ba katei ka Sub Centre ka hap ban khmih bad ai jingshakri ki kynthup ïaka shnong Umsarang, Nongtraw Bangla, Lumdiengngan, Lumrit, Kyrteng, Wah Myntait, Mawkduk, kaba long ka jingkyrkhu kaba khraw ban pynïajan sha ki paidbah ïaka jingshakri jong ka tnad ka koit ka khiah khamtam ki khyllung bad ki longkmie ba armet.
Haba kren ha katei ka sngi naka liang u Bah Damanbait Lamare u la ong ba kane ka jingplie ïa katei ka jaka sumar ha katei ka shnong kan long ka jingkyrkhu ïaki paidbah katei ka thaiñ, namar ki jingshitom ba rit ba ria kim donkam shuh ban leit sha ki jaka sumar ba kham jngai kaba ktah ïaka jinglut jingsep jong ki.
U la kyrpad ruh ïaki nongtrei katei ka sub-centre ba kin ai ka jingshakri kaba paka, ban nym mih kano kano ka jingshah kynthoh ne ka jing torti haka rukom treikam, hynrei katei ka jaka ai jingsumar ka dei ban long ka jingmyntoi ïaki paidbah kiba leit phah sumar ha katei ka jaka sumar.