Shillong, Ïaïong 14: Ka khubor ba la ïoh na ki pulit la iathuh ba u Uttam Sangma u la phah ka jingujor ba ha ka 5 tarik mynta u bnai, kawei ka kali kaba don u nombar AS-01EG-7134 ba la ñiah da u briew bym lah ban ithuh u la tyrwa shong hapoh ka kali ban leit buh sha ka jaka sah jong u na Ringrey sha MDC Quarter, Hawakhana Tura (WGH), hynrei u la ieh pat ïa ka pla hapoh ka kali jong u. Kham hadien haba utei uba la ujor u la phone ïa u nongñiah hynrei um shym la kren satia ïa ka phone.
Ha kawei pat ka jingjia ki pulit ki la ïathuh ba u Coy-Commander, C-Coy, 144th Bn., BSF u la phah ka jingujor ba ha ka 8 tarik mynta u bnai ki shipai BSF ki la ïoh bat uwei u nong Bangladeshi uba la ithuh kyrteng da u Hafikul Islam ba la 60 snem ka rta katba u dang jam shapoh u pud u sam ka ri India na South Garo Hills bad ki la lap ruh na u ka pisa Taka 130/- (Bangladeshi currency) bad na ka liang ki pulit ki la kem noh ïa une u nongwan rungtuh beaiñ.
