Plie u MLA barim ïa ka Library Room bad ka Science Lab jong ka skul Sawmer Presbyterian

Shillong, Ïaiong 14 : Ka Sawmer Presbyterian Secondary School ha ka sngi Nyngkong ka la ïoh ban plie paidbah ïa ki ar tylli ki kamra ba kytnhup ïa ka Library room bad kumjuh ka Science Laboratory class room.
Ïa kine ki kamra klas ba thymmai la wan ban plie da u MLA barim ka Mylliem ba dei ruh u Nongai buit jong u Myntri Rangbah ka Jylla, Bah Hamletson Dohling ha ryngkat ka jingdonlang u M Nongdhar Asst Engineer Mylliem C&RD Block, ki Tymmen Basan, Rangbah Balang, ki Seng Longkmie bad Seng Samla ka Balang Sawmer.
Shwa ban plie ïa kine ki kamra klas, u Bah Hamlet u la ong ba u sngewnguh ïa u Blei uba la plie ka lad ba un lah ban ïai bteng ban kyrshan ïa kane ka skul. Ha kajuh ka por u ong ruh ba u sngewsarong ban tip ba ka skul ka la kiew shaphrang khamtam ban tip ba baroh ki khynnah ki la pass lut ha ka result Matrik ba dang shu dep pynbna.
“Na ka liang jongnga, katba lah ngan pyrshang ban thaw ïa ki lad ki lynti ban kyrshan ïa ki jingdonkam jong kane ka skul,” u la ong.
Na ka liang u Tymmen Basan Bah S Kharkongor haba kren ha kane ka jingïalang u la pynpaw ka jingsngewburom ïa u Bah Hamlet uba la ïai bteng ban kyrshan ïa kane ka skul khamtam ban ïoh ïa ki kamra klas kiba biang bad paka.
“Hapdeng ka jingïaid lynti jong ka skul ngi la mad shibun ki jingeh hynrei ngi ainguh ïa u Blei ba u la don ryngkat bad ïalam lynti ïangi ban long kumba ngi long mynta,” u la ong.
La pynphuh ïa ka jingïalang da ki prokram bapher bapher ba la ai da ki khynnah jong kane ka skul.