Sdang ka RBBA ïa ka lympung ïalehkai Badminton ha Nongpoh
Wan shimbynta shitrhem ki samla na kylleng ka ri Khasi.
Nongpoh, Rymphang 17: Ka Ri-Bhoi District Badminton Association hynnin ka sngi Thohdieng kala ïoh ban sdang ïaka lympung ïalehkai Open to all Badminton Tournament ha State Sports Council, Meghalaya Indoor Stadium kaba don ha Umlyngkdait Nongpoh.
Ha katei ka lympung la sakhi ruh ba ki samla donsap ha katei ka jait jinglehkai na kylleng ka ri Khasi kila wan ban shimbynta shitrhem naduh kiba dang khynnah haduh kiba la kham rangbah ha kaba haka Mens Single ki don haduh 21 ngut ki nongïashim bynta, haka Men’s Doubles ki don haduh 22 kynhun bad haka Men’s Veteran 40+ ki don haduh 10 kynhun.
Kum ban shu pynpaw ba ka jingthmu jong ka RBBA ban pynlong kum katei ka lympung ka long ban lum ban lang bad ban sei madan ïaka sap ka phong ki khun samla ha ka jinglehkai Badminton bad ban ailad khamtam ïaki samla kiba dang sdang ban kiew ha katei ka jait jinglehkai kaba la sdang ruh ban paw haka jylla.
Lyngba katei ka lympung kan long ruh kum ka jinghikai ïaki samla ba kidei ban pynmlien ïalehkai ban kilan met la ha kano kano ka sap kaba ki don ban kiar naki jingmlien ba sniew kum u drok bad kiwei kiwei ki jingdih buaid bad khamtam ban ioh ka met ba koit ba khiah.
La sakhi ruh ha katei ka sngi da ka jingdonlang ki nongïalam ka RBBD naduh u Bah Franky Lyngdoh President, Anant Swet Secretary bad kiwei kiwei ki riew rangbah naka them Ri-Bhoi.