Mawkyrwat, Rymphang 17: Ka Mawkyrwat District Sports Association (MDSA) hynnin ka sngi ka la ïoh ban sdang ïa ka lympung ïalehkai kynjatbol kaba la tip kum ka Women’s League Football Tournament 2023-‘24 hapoh ka madan Artificial Turf, MDSA, Nonglang, South West Khasi Hills District.
Ki kynhun kiba la ïoh ban ïalehkai ha ka sngi plie pyrda ki long ka Jakrem Sports Club pyrshah ïa ka Marshillong Sports Club ha kaba ka Jakrem SC ka la jop da 6 – 0 kol bad ïa ki kol la thep da ka Barisha Wahlang kaba la ïoh haduh 4 kol marwei, nangta, ka Rosemerry Wahlang bad ka Ibansuklin Syiemlieh ki la ïoh ban thep mar shi kol.
Ha ka sngi plie pyrda ïa kane ka Women’s League 2023-’24 u General Secretary ka Mawkyrwat District Sports Association (MDSA), u Bah Pros Wanniang u la long kum u kongsan ha ryngkat ka jingïadonlang ki dkhot ka Football Committee, u bah Khrawkupar Shangdiar, Secretary Football Committee jong Mawkyrwat District Sports Association (MDSA), u bah Dawning Secretary, Ground Committee bad kiwei de ki dkhot ka Mawkyrwat District Sports Association (MDSA) bad ki ‘riew rangbah na ki sport clubs bapher bapher ba la ïashimbynta ha kane ka Women’s League Football Tournament jong u snem 2023-‘24.
