Shillong, Rymphang 17: Ka jingïalehkai jong ka lympung Shillong Cricket League 1st Division hynnin ka sngi Thohdieng ka la jam sha kaba kut ha kaba ka Nongkseh United ka la khur ïa ka jingjop hadien ba pynliem ïa ka Masonic CC.
Haba phai sha kane ka jingïakhun, ïa ka toss la jop da ka Masonic bad ka la jied ban bol nyngkong. Haba shimti ïa ka pali ban tied nyngkong, ka Nongkseh ka la buh thong da 213 ron shuwa ban hap baroh 10 ngut na ka 39.4 over. Ki rangtied kiba la kamai bun ron ïa ka kynhun ki kynthup ïa u Iateilang shangpliang, u ba la khyrwit haduh 63 ron naki 60 bol, katba u Bona Myrthong u la tied 40 ron naki 65 bol. Na ka liang jong ki rangkawangbol ka liang pyrshah, u Kunal chettri u la ïoh ban pyndep 8 over, shah tied 42 ron bad khur 5 wicket, u Bhuwan thapa u la kawang 7.4 over, shah tied 31 ron bad khur 3 wicket.
Haba jubab ïa katei ka ron ka Masonic ka la kynjoh tang 156 ron hadien ba shah pynkhyllem baroh 10 ngut ha ka 33.3 over. Ki rangtied kiba la kamai ron bun ïa ka kynhun ki long u Bharat Rana (51 ron naki 56 bol) bad u Sanjay biswa (20 ron naki 34 bol).
Katba na ka liang ki rangkawangbol kiba la seisoh ki kynthup ïa u Bushbashisha Tohtih (6 over: shah tied 16 ron: bad khur 3 wicket) bad u Richmond Nongdhar (5 over: shah tied 14 ron: bad khur 3 wicket), kaba la ïarap ïa ka kynhun ban jop da 57 ron.
