Shillong, Rymphang 17: Ka kynhun ïalehkai kriket jong ka Meghalaya ka la lah ban ïalehkai bha da kaba tied 304 ron shuwa ban shah pynkhyllem baroh shiphew ngut ha ka inning ba nyngkong hynne ka sngi ha ka jingïakhun ïa ka final jong ka Ranji Trophy Plate Group pyrshah ïa ka Hyderabad, ha Rajiv Gandhi International Stadium.
Haba shimti ïa ka pali tied, ka Hyderabad ka la khylliap ïa ka sngi da 25 ron bad hap 2 ngut, bad ka dang sahdien sa 279 ron.
Ka Meghalaya ka la jop ïa ka toss ha kane ka final bad ka la jied ban tied nyngkong. Napdeng ki rangtied ka jylla, u Raj Biswa u la wan ba nyngkong da kaba khyrwit haduh 64 ron, katba u Akash Kumar Choudhury u la tied 50 ron khlem shah pynhap.
Ki la don katto katne ki player kiba la lah ban kyntiew ïa ka ron na bynta ka kynhun bad ruh kito ki bym shym la seisoh ha ka tied na ka kynhun, watla kata ruh, kumba ka paw ka Meghalaya ka la pynpaw ïa ka mynsiem ïakhun pyrshah ïa katei ka kynhun ba khlaiñbor.
Naka liang jong u Raj u la tied ïa katei ka ron kaba u la kamai na ki 48 bol, kiba kynthup ïa 9 tylli ki four bad 3 tylli ki six. U la ïoh ka jingkyrshan ryngkatlang da 81-ron na u Arien Bonchang Sangma (18 ron naki 35 bol).
U Swarajeet Das ba la mih ha ka pali tied ba lai u la kamai 31 ron, katba u Kishan Lyngdoh (29), u Jaskirat Singh Sachdeva (46) bad u Dippu Sangma (42) ki dei kiwei pat ki player kiba la kyntiew ïa ka ron na bynta ka kynhun.
U Jaskirat lem bad u Dippu ki la ïoh ban kyntiew 87 ron shuwa ban hap u wicket ba hynñiew, hynrei phewse, baroh ar ngut ki la shah pynhap noh khlem da kynjoh mar shiteng ïa ka spah ron (half-centuries).
Hynrei na ka liang jong u Akash, u khlem shym la mad ïa katei ka jingeh, da kaba thlieh naphang ïa ki bol jong ka Hyderabad, ha kaba u la khyrwit haduh saw tylli ki four bad saw tylli ki six naki 57-bol ban kynjoh 50 (not out). U la lah ban kynjoh sha katei ka ron shuwa ba un duh paralok ban bteng ïa ka jingïalehkai, hadien ba u Tanay Thyagarajan jong ka Hyderabad u la pynhap noh ïa u wicket ba khadduh ban pynkut ïa ka inning bol jong u da 5/103.
Ka kynhun ba ïalehkai hala ïing (Hyderabad) ka la ïohlad ban tied tang 8 over namar ba la kem dum ka sngi. Ka Hyderabad ka la mad jingeh ha ka pali tied jong ka ha kaba ka la shah pynhap haduh 2 ngut shuwa ban pynkut ïa ka sngi, baroh ki dei kiba la khur da u Chengkam Sangma, u ba la sdang nyngkong ban bol ha ka sien mih madan ba ar jong u ha ka Ranji mynta ka samoi.
U la pyndep da kaba khur 2/9 naki 3 over bad ka Meghalaya kan pynleit jingmut ban bteng da kane ka rukom bol ban khanglad ïa ka Hyderabad ynda la sdang biang ïa ka jingïakhun mynta ka step.
