Sdang ka ophis u DMHO Ri-Bhoi ïa ka jingïalap ai tika ïa ki khyllung bad ki longkmie ba armet

Nongpoh, Nailur 07: Ka ophis jong u District Medical and Health Officer, Ri Bhoi District, Nongpoh ka la pyntip sha baroh ki kmie ki kpa jong ki khunlung rit kiba hapoh 5 snem ka rta ba ka la sdang ïa ka campaign na ka bynta ka Intensified Mission Indradhanush (IMI) kaba dei ka campaign ba la pynlong ha baroh kawei ka ri India bad ka jingthmu jong ka ka long ban ïarap bad pynbiang ïa ka jingai tika ïa kito ki khunlung kiba hapoh 5 snem ka rta bad ïa ki kmie kiba armet kiba khlem pat ioh ïa ki tika naduh mynshuwa khnang ba baroh kiba lah dei ban ioh ïaki tika ba kin shim noh ha kane ka por.
Kane ka dei ka sienjam kaba heh da ka jingangnud ban pynlong ïa ka ri India kaba lait na ki jingpang Measles bad Rubella. Ka tika ka long kaba shngaiñ bad ka ïada ïa ki khun rit na ki 12 jait ki jingpang, kita ki dei ka Diptheria, Pertussis, Tetanus, Polio, Measles, Rubella, Hepatitis B, Pneumococcal Pneumonia, Meningitis, Pneumonia na u Haemophilus Influenza Type-B, Rotavirus bad Japanese Encephalitis.
Lada i khunlung ba hapoh 2 snem ka rta i bym pat ioh tika eiei mynshuwa hynrei lada i wan ai noh mynta ïa kane ka tika, in ioh jingïada na ki 7 jait ki jingpang ïa kiba la tip kum ka Diptheria, Pertussis, Tetanus, Polio, Measles, Rubella bad Japanese Encephalitis.
Namarkata ka jing pynkhreh ban bteng ïa kane ka campaign IMI 5.0 ka la sdang shaid shaid naduh u bnai Nailar bad kan kut haduh u bnai Risaw 2023. La phiah ïaka ha ki 3 tylli ki bynta, ïa ka bynta ba nyngkong la pynlong naduh ka 7 – 12 tarik Nailar 2023, ka ba ar naduh 11- 16 tarik u Nailur bad kaba lai yn sdang naduh k a 9-14 tarik u Risaw 2023.
Bad ioh jingtip kaba khambniah shaphang ka jaka bad ka por ban ai ïaka tika, ki kmie ki kpa ki lah ban ïa kynduh ïaki ASHA, ANM bad ha ki jaka ai jingsumar jong ka sorkar kiba hajan eh.