Khliehriat, Nailur, 7: U Deputy Commissioner ka East Jaiñtia Hills District, u pynbna ba ka Ministry of Home Affairs, Government of India, ka la buh ka jingkyntu ha kaba ïadei bad ki kyndon jong ka Flag Code of India, 2022 bad ka Prevention of Insults to National Honour Act, 1971, kaba iadei bad ka jingpyndonkam ïa ka lama ka ri India.
La ong ba ka lama ka ri ka ieng na ka bynta ka jingkyrmen, ka jingioh mynsiem ki paidbah ka ri India, ka dei ruh ka shap jong ka jingsarong ka ri India kaba dei hok ban burom kum ka lama ka ri, ka lama ka ri, ka shim ruh ïa ka bynta kaba kyrpang tam ha ka jingmut jingpyrkhat jong ki nongshong shnong jong ka ri India, ka jingong kaba na ka Ministry of Home Affairs, ka iathuh ruh ha ki sngi kyrpang, kum ki sngi ba pynlong ïa ki cultural bad sport, ïa ki lama la shna da ka kot bad pyndonkam da ki paidbah, , ïa kitei ki lama ym dei ban shu bret pathar ha madan hadien ba la dep ka prokram, hynrei dei ban da buh bha bad bret bha da kaba burom ruh ïa ka lama jong ka ri.
Ka jingpyndonkam bad ka jingpynher ïa ka lama ka ri India ka don hapoh ki kyndon jong ka Prevention of Insults to National Honour Act, 1971 bad ha ka kyndon jong ka Flag Code of India, 2002, ka Flag Code of India, 2002 ka la don ka jingkylla khyndiat kaba katkum ka hukum (order) kaba myn ha ka 30 tarik u nohprah 2021 ha kaba la shah ruh ban pyndonkam ïa ka lama ba shna da ka polyester lane ka machine shna lama.
Katkum ki kyndon kiba paw ha ka Flag Code of India, 2002, u riew paidbah lane ki kynhun shimet lane ki jaka ai jinghikai kum ki skul, ki educational institution ki lah ban pynher lane kan pyni ïa ka lama ha baroh shi sngi jong ka prokram kum ka jingburom ïa ka lama ka ri.
Katkum ka Flag Code of India, 2002 kaba long katkum ka hukum ba la pynmih ha ka 20 traik u niatung 2022 (xi) jong ka paragraph 2.2 – Part-II jong ka Flag Code of India ka bthah ba ïa ki lama ba la buh ha bar lane hapoh ki iing dei ban pynher bad sngi bad miet.
La ong ruh ba ka lama ka dei ban long ha ka dur sawdong (rectangular), haba pynher ïa ka lama ka pyni ïa ka kyrdan jong ka burom jong ka ri bad ym dei ban pynher da ka lama kaba la jot ne da kaba la sniew dur.
