Thung tynrai dieng ka Social Forestry bad Environment Wing ha Archbishop’s House Laitumkhrah
Jowai, Nailur, 07: Hadien ba ki bor pynïaid ka Archbishop’s House Laitumkhrah kila pynkhyllem ïa ki katto katne tynrai diengkseh kiba buh jingma ïa ki nongleit nongwan ban thung tynrai tynrai dieng pat haka jaka kine kiba la dep pynkhyllem, na ka liang ka Social Forestry & Environment Wing East Khasi Hills, hapoh ka jingïalam u bah Wilson Shadap Manner IFS kila wan thung dieng hynne ka sngi 7.9.2023 kumba 60 tynrai eiei ha kane ka jaka kaba la pynkhyllem ïa ki diengkseh kiba lah ban buh jingma ïa ki nongleit nongwan ha kano kano ka por.
Hashwa ban sdang ïa ka jingthung dieng la pynlong ïa ka jingïalang kaba lyngkot bad la ïoh ïa ka jingkren kaba sngew tynnat na u Bah Wilson Shadap Manner IFS, Chief Conservator of Forests Social Forestry and Environment Wing Meghalaya, halor ka jingdonkam ki dieng ki siej bad kan pynneh pynsah ïa ki.
Naba lyngba ka jingdon ki dieng ki siej u khun bynriew u ïoh ïa ka lyer kaba khuid ban ring mynsiem. Nangta u ong haba ïoh ban ring mynsiem ïa ka lyer kaba khuid ngi ïoh ïa ka met ka phat kaba koit kaba khiah.
Shuh shuh u bah Shadap Manner u ong ba na ka liang jong ka ophis, kam mut tang ban shu wan thung dieng mynta ka sngi 7.9.2023, hynrei ka ophis kan iaibteng ban sumar lang bad ki trai jaka haduh ba kine ki dieng kin da heh da sa bha.
U bah Shadap Manner u kyntu ïa ki Phadar ka Archbishop’s House ba lada don kino kino ki tynrai dieng kiba ïap, ki dei ban pyntip sha ka ophis ba kin wan ban thung (replace) ïa kito ki tynrai dieng kiba la ïap.
Ha kane ka sngi la ïoh ruh ïa ka jingkren sngewnguh ïa baroh ki nongtrei ka Forest Department da u Most Rev. Archbishop’s Victor Lyngdoh D.D. Ha kane ka sngi nalor u Phadar Richard Majaw, la ïa don lang ruh ki riew rangbah kum u Bah Markus Marngar, Bah M.M Thaiang bad kiwei de ki rangbah bad kiba la ïashim bynta ruh ban ïathungdieng mar shi tynrai.
Ka jingthung ïa kine ki tynrai dieng ha kane ka jaka kaba la synlen, kan pynlong ïa kane ka jaka kaba jyrngam ha ki khyndiat snem kiba ban wan.