Ba jot rathai ka surok Umden, rah ïa ka jingeh ki paidbah ha Assembly, kyntu ka RBYO ïa u MLA

Nongpoh, Nailur, 07: Ka Ri-Bhoi Youth Organisation (RBYO) haka jingïalam jong u President ba rangbah ka seng u Samla Baiateilang Lapang ryngkat bad ki dkhot kila leit ban jurip syndon ïa ka surok naduh Iewmawlong shaduh Umden namar ka jingjot rathai bad buh jingeh shaba palat ïaki paidbah kiba leit ba wan man la ka sngi mynta la bun phew snem bad kyntu ruh ïa u MLA ka Nongpoh u Bah Mayral Born Syiem ba u dei banrah ïa katei ka mat sha dorbar synrai ka ban sa long shen ban ïatai bad pynsngew sha ka sorkar halor ka jingeh kaba ki paidbah katei ka thaiñ ki ïakynduh.
Ha ka jingleit jurip jong ka seng la lap shisha ba ki paidbah ki mad ïa ka jingeh kaba khraw ha ka leit ka wan, ki samla pule kiba beh sha ki jaka pule bapher bapher, ki paidbah kiba hap ban pynpooi ïaki mar rep sha ki ïew ki hat bad kumta ter ter, kaba la donkam shisha ïaka sorkar ba kan phai khmat ban pynurlong noh ïa katei ka surok ba donkam eh jong ki phew tylli ki shnong ha ka thaiñ Umden.
Haba kren sha ki lad pathai khubor na ka liang u Samla Baiateilang Lapang u la ong ba ha katei ka jingleit jurip u la ioh ruh ban ïakren bad shibun ki paidbah naduh kiba shong dukan, kiba ñiah kali kamai bad kiwei kiwei ha kaba kila pynpaw shisha ïaka jingsngewdiaw bad sngewsih namar ba kum ki paidbah ki la mad jingeh mynta la bun phew snem bad kam don shuh wat kano kano ka jingmaramot ïa katei ka surok bad kaba kham sngew sangsot shuh shuh ka long ïakiba longkmie kiba armet, kiba pang bad shitom ki shem jingeh shisha ban ïaid lyngba katei ka surok.
U la ong ruh ba kum ka seng ka kyntu ïa u MLA ka Nongpoh u Bah Mayral Born Syiem ba u dei ban shimkhia ban pynsngew sha ka sorkar ïa ka jingeh kaba ki paidbah katei ka thaiñ ki ïakynduh khamtam ba u dei ruh ban rah ha ka jingïatai ha Assembly ha kane ka dorbar synrai ka ban sa long shen na ka bynta ban pynsuk ïa ki paidbah ha ka leit ka wan.