Shillong, Naiwieng 20: Ka kynhun ïalehkai phutbol jong ka Meghalaya ka la wanphai nadien ban pynliem ïa ka Arunachal Pradesh ha ka jingïalehkai kaba nyngkong jong ka Group E ha ka Senior Men’s National Football Championship na bynta ka Santosh Trophy 2024-25 ha Nalbari, Assam, ha ka step sngi Balang.
Ha kane ka jingïakhun, ka Arunachal ka la ïoh ban lamkhmat da 3-1 kol kumba katto katne por shuwa ba ka Meghalaya kan pynkhihjar lai sien kynthih ban jop da 4-3 kol.
U Overkindness L Mawnai (8′) u la lah ban ai mynsiem ïa ka Meghalaya ha ka jingïaidlynti ha kane ka lympung da kaba pynkhihjar tang hapoh 10 minit ba la ïaid ka por.
Hynrei, ka Arunachal ki la ïakhun shitom bad ïoh lamkhmat ïa ka jingïalehkai haba kut jong ka kylla step lyngba ar tylli ki kol na u Omang Dodum (15′) bad u Tagru James (45’+1).
Ka Arunachal ka la ïoh ban pynbud sa ka kol kaba lai ha ka 61 minit na u Tarh Dolu hynrei naduh kane ka por ba ki rangïalehkai ka Meghalaya ki la sdang ban shimti bad tehlakam ïa ka jingïalehkai, ha kaba u Fullmoon Mukhim u la pynkhih ïa ka kol kaba nyngkong jong u ha ka 63 minit, tang hadien 2 minit u rangïalehkai ba mih bujli ha ka kylla miet – u Robertson Khongriah (65′) u la pynïakhaid mar 3-3 kol.
U Fullmoon uba dei u kapten jong ka kynhun Meghalaya bad ha kaba kut u la ïoh ruh ïa ka namtam kum u ‘Player of the Match’ u la thep ïa ka kol kaba ar jong u ha ka minit kaba 83 ban pynskhem ïa ka jingjop na bynta ka kynhun ïalehkai ka jylla ba la ïalam da u Bah Hering Shangpliang kum u Coach.
Hadien nangta, ka Nagaland ka la pynliem noh ïa ka Assam (ka jylla ba ïoh pynlong ïa ki jingïalehkai ka Group-E) da 2-1 kol.
Ka Meghalaya kan ïakhun biang pyrshah ïa ka Nagaland ha kajuh ka jaka ha ka por 9 baje mynstep ka sngi Thohdieng. Na kawei pa kawei ka Group tang kawei ka kynhun kan ïohrung sha ka wat ïakhun kaba bud jong ka Santosh Trophy
Ka thup kynhun jong ka Meghalaya kiba mih madan ha ka jingïalehkai hynne ka sngi ki long:
Siwel Rymbai (GK), Overkindness L Mawnai, Arlangky Nongsiej, Donborlang Nongkynrih (sub Aenam Jyrwa 64′), Wanboklang Lyngkhoi, Aibiangmame Nongneng (sub Deibormame Tongper 64′), Badondor Marbaniang (sub Robertson Khongriah HT), Damanbhalang Chyne (sub Baiaikara Swer 85′), Fullmoon Mukhim, Kevin Rymbai, Donlad Diengdoh (sub Banraplang Pyngrope 85′)
