K a jingjyllei ki kam sniew naduh ki kam tuh kam thiem, ki kam runar haduh ki kam ïadih ïakhaïi drok ka la ban khia haduh katta ïa ka tyrpeng jong ki bor Pulit bad kumta ki donkam ka jingïatreilang na ki bor synshar shnong bad na ki Village Defence Party (VDP) ban teh lakam ïa ki kam sniew ba har rukom.
Ka Sorkar MDA kaba la pynbna ïa ka Drug Reduction Elimination and Action Mission (DREAM) bad lyngba kane ka projek ka sorkar ka la thmu ban pynkhlaiñ ïa ki VDP hadien ba la pynbna thma pyrshah ïa ki nongkhaii drok.
Ha ki snem kiba mynshwa ki shnong ki thaw kiba don ïa ki VDP ki shngaiñ bha namarba ki samla bad ki rangbah ki pyndonkam shisha ïa ka iktiar ban ïakit ïa bah ïa ka lyngkor hapoh ka shnong ka thaw. Hynrei ha ka jingtyllun jong ka shalyntem ki por, ki VDP ki la kylla long tang kum shynrong bym treikam eiei ha ki katto katne ki shnong. Watla ki Seng Samla ki don ha ki shnong bapher bapher hynrei ka eh bha ïa ki ban tem ïa ki kam runar ruser namarba ynda poi ha ki khep ban shah ring saiphla hakhmat ka Kashari bun ki kyntait. Hynrei watla katta, ki don pat ki bym salia tang na ka bynta ban ïada ïa ka shnong ka thaw na kino kino ki kam bymman ki mih shakhmat ban ïarap lang ïa ki bor Pulit ban long ki nongsakhi pyrshah ïa ki nongleh kam bymman.
Haba bishar ïa ka jingtlot ki VDP ha kine ki snem ba la leit noh ka long namarba ki dei tang ki kynhun trei mon sngewbha bad ka jingbym ïoh jingïarap eiei na ka Sorkar ka pynngiah noh ïa ki ban trei tang kum ki nongtrei mon sngewbha. Hynrei ynda ka Sorkar ka la sngewthuh ba ka donkam ïa ki VDP ban kyrshan lang ïa ki bor Pulit kam banse ban wanrah ïa ka jingpynbeit thymmai ha ka Meghalaya Police Act, 2010 ban kyntiew ïa ka jingsiew bainong ïa ki dkhot jong ki VDP bad ban pynbiang ruh ïa ki Uniform bad ki Torchlight.
Ki shnong kiba khlaiñ bha ki VDP ki runar bad ki nongleh kam sniew ki lait im na ka kti jong ki paidbhur namarba ki ïada ïa ka jingim jong ki nongleh kam bymman khlem da shim ïa ka aiñ ha la ki jong ki kti. Hynrei ki don pat ki shnong kiba ka VDP ka long tang kum ka shynrong haba ïohkem ïa ki nongleh kam bymman bad ki nongleh kam sniew ki shu ngat ei ha ka kti jong ki paid bhur ki bym tip ïa ka dang ka duh bad ïa ka bishar ka khadar bad kiba shu thmu ban dkhat jubor beit ïa ka jingim jong ki nongleh kam bymman. Ka jingduhei jong ka mynsiem ki nongleh kam bymman ka jia ruh haba ki paidbhur kim salia ïa ki bor synshar Shnong. Hynrei ka jingkhlain jong ki VDP, ki Seng Kynthei, ki Seng Samla ka ïada ïa ki nongleh kam bymman ban duhei ïa ka jingim bad ki ngat pat ha ka jingshah tian bishar hakhmat ka aiñ jong ka ri.
Ka jingdon jong ki kashari shnong ha ki shnong ki thaw ka ïarap ïa ki nongsynshar shnong kumno ban tehlakam ïa ki kam bymman bad ban tian bishar ïa ki nongleh kam sniew barit baria.
Na ka jingkylla ka jinglong jingim jong ki briew namar ka jingrung jong u drok sha ka jylla ka la pynsngewkhia ïa ki dorbar shnong bad ïa ki longing ki longsem kiba kyiuh that that ïoh ba ki khun ki kti kin ngat ha ka jingshah pynap shrip ha ki tien jali jaum jong ki snar khaii drok. Ka jingkylla syndet ka jingim jong ki briew ha kane ka juk, ka la pynieng skhor ïa ka sorkar bad ïa ki shnong ki thaw namarba tang ki Pulit kin nym lah ban tehlakam ïa ki kam sniew ba har rukom bad kumta ka donkam bha ba ïatreilang ban rat dyngkhong khamtam u drok da ka jingdon jong ki VDP.
Haba bishar bha ïa ka jingdon jong ki VDP, kan ïarap haduh katta katta ban tem ïa ki kam khaii tuh ha ki shnong khappud ka jylla bad ka Jylla Assam ba ka ri Bangladesh. Ha nongbah Shillong kaba dei ka nongbah jong ka Jylla ruh ka donkam bha ban pynkhlaiñ ïa ki VDP namarba ki kam runar ki jia bha hapdeng nongbah bad kham duna sha ki shnong nongkyndong kiba lah ban jia tang tengkhat lano eh.
