Sdang ka District Level Industrial Exhibition ba ar sngi ha Nongstoiñ
Donkam pynjur ïa ki lympung ban kyntiew ïa ki nongseng kam lajong: H.K Thabah
Nongstoiñ, Rymphang 19: Da ka jingthmu ban wanrah ïa ki rynsan ban pynïoh ïa ka iew ïa die ïa thied na ka bynta ki nongseng kam lajong kiba dei napoh jong ka West Khasi Hills District, ka Ophis jong ka District Commerce and Industries Nongstoiñ, ka la pynlong ïa ka District Level Industrial Exhibition kaba ar sngi lynter ha ka 19 bad 20 tarik u Rymphang 2024, ha madan New Nongstoiñ.
Ha kane ka lympung la sakhi ïa ka jingwan ïashim bynta jong ki nongshna bad ki nongdie ïa ki tiar ki tar ki bapher bapher, kaba kyntup naduh ki jingshna kti, kum ki mula, ki tiar tem tynrai, ki jingbam, ki umsoh, ki jingshna kti ki bapher bapher bad kiwei kiwei de.
Ki la don ruh haduh kumba 37 tylli ki dukan kiba la shna kyrpang ha kane ka exhibition, ha kaba ki nongshna bad ki nongdie ki la ïoh ka lad ban pyni nam bad pynïaid iew ïa ki tiar ki tar jong ki. Napdeng kine ki 37 tylli ki dukan, kawei ka dukan kan sa shah jied ban leit mih khmat ïa ka District sha ka State Level.
U Bah H.K Thabah ADC Nongstoiñ, u la long u kongsan bad u la plie pyrda ruh ïa kane ka exhibition, ha ka jingdong ryngkat lang jong u Bah S. Marweiñ, EAC Nongstoiñ, u Bah H. Kharkongor Additional SP Nongstoiñ, I Kong I. Wahlang, General Manager DCIC, Nongstoiñ, u Bah B.F Sun, Functional Manager, DCIC Nongstoiñ, kiwei pat ki ophisar sorkar, ki nongïashim bynta ha kane ka exhibition, ki nongseng kam lajong kiba dei napoh ka West Khasi Hills bad Eastern West Khasi Hills, District.
Haba ai jingkren ha kane ka sngi kum u Kongsan, u Bah H. K. Thabah, u la pyrto ïa ka ophis jong ka District Commerce and Industries Nongstoiñ, kaba pynlong ïa kane ka exhibiton mynta u snem, kumjuh ruh ha ki snem kiba la leit, namar ka long kum ka jingai rynsan ïa ki nongseng kam lajong ba kin die bad pyni nam ïa ki jingtrei jingktah jong ki.
U la ong ba kum kine ki lympung ki long kiba donkam eh, khamtam ha kane ka juk ba ka jingïoh kam sorkar ka lah nang jynjar. U la ong ba ka long kaba donkam haduh katta katta ba ki khun samla bad kiwei ruh kumjuh, ba kin sdang noh da ki kam lajong khnang ba kin lah ban pyndap dalade ïalade bad ban kyntiew ruh ïa ka ïoh ka kot jong ka District bad ka Jylla hi baroh kawei.
Ki dei ban shim kabu ïa ki subsidy skhim kiba ai da ka sorkar lyngba ka ophis jong ka District Commerce and Industries bad ban pyndonkam hok ïa kine ki skhim na ka bynta kata ka kam kaba ki thmu ban seng. Ki dei ruh ban seng da ki kam kiba don ïa ka iew ka hat khnang ban ym dkoh kata ka kam ka jong ki.
U Bah, H. K. Thabah, u la kyntu ïa ki paidbah ka thaiñ Nongstoiñ ba kin wan sha kane ka exhibition kaba ar sngi ha madan New Nongstoiñ, khnang ban thied bad ban ai mynsiem ïa ki nongseng kam lajong kiba dei napoh jong ka District.