SHILLONG, Lber 12: Kawei na ki jingïalehkai jong ka lympung Shillong Cricket League Super Division 2024-25 ba la pynïaid da ka Shillong Cricket Association ha madan Polo, hynne ka sngi Balang, ka la jam sha kaba kut ha kaba ka Nongthymmai SCC ka la pynliem ïa ka Khalsa Warriors da 61 ron.
Hadien ba jop ïa ka jingkynting pisa (toss) ka Nongthymmai ka la lah ban kamai 104 shuwa ban khyllem baroh 10 wiket haki 25.2 ober. U Raja Lama (29 ron naki 24 bol) bad u Ranjeet k Rai (26 ron naki 35 bol) ki la long kiba kongsan ha ka tied. U MD Siraj Ali u la khur 3/24 naki 6 ober, katba u Kushaldeep Singh u la khur 2/23 naki 6.2 ober.
Watla ka Khalsa Warriors ka la lehbha ha ka bol hynrei haba wanphai ban tied kane ka kynhun ka la shah pynkut noh da tang 43/10 haki 19 ober, dei tang u Aditya Mahala (10 ron naki 24 bol) uba la kynjoh ïa ka phew ron.
U Sagar Chettri u la khur 3/16 naki 5 ober, hynrei ka namtam ka long sha u Raja lama uba la khur 4/11 naki ober ban khur ruh ïa ka khusnam Player of The Match, ha kaba ka Nongthymmai ka la jop ïa ka jingïalehkai da 61 ron.
