Sawsnem ki buh ïa ka ILP ha kyndong mynta pat ki wan pynbiej elekshon: Prestone

Shillong, Rymphang 21: U Symbud Myntri Rangbah ka jylla u Bah Prestone Tynsong ha ka sngi Ba-ar u la ther tyngeh ïa ka BJP namar ka jingpynslem ban mynjur noh ïa ka jingpyntreikam ïa ka ILP ha ka jylla bad ong ba ba ka BJP kaba don ha ka jylla bad ha ka sorkar pdeng, kala leh politik ïa kane ka mat jingdawa namar ka BJP ha Delhi ka don u Shabi ban pynurlong ïa kane ka jingdawa la saw snem tam mynshuwa.
“Ka long kaba sngewthamula ban ïohi ba ka BJP ha ki mat kular elekshon jong ka bad ka jingkren ki nongïalam halor ka jingdonkam ILP ha ka jylla. Ka ïingdorbar da kawei ka sur ka mynjur ïa ka Resolution ha u snem 2019 bad ngi la phah sha ka sorkar pdeng bad ngi la leit ruh sha Delhi la bun bun phewsien ban ïakren ïa kane ka mat, hynrei ha kane ka jingïakynduh ba la bun sien bha bad ki heh ka sorkar pdeng bad ïa ki myntri ka sorkar BJP ka jingmih hi ka long ba kam shym la shimkh ïa eiei ïa kane bad kumjuh ruh lada phi peit ïa ka jingdawa ban pynrung noh ïa ka ktien Khasi bad Garo ha ka Khyrnit Ba Phra ka riti synshar,” ong u Bah Prestone Tynsong ha ka jingkren sha ki lad pathai khubor.
U la ong, mynta ba ka elekshon ka la wan lah ban ïohi ba i kumba ka BJP ka la pynpaw ïa ka jingshimkhia ïa kine ki ar tylli ki mat kaba ki paidbah ka jylla ki la dawa la bun snem.
“Kane kadei tang ka jingleh politik ka jong BJP namar ka elekshon ha ka jylla la ha kaba ïadei bad ka jingtyrwa jong ngi ban ïoh jingmynjur na u Lat ïa ka jingpynkylla ïa ka Meghalaya Residents Safety and Security Act (MRSSA) namar kane ka jingtyrwa ruh ka sahkut mynta ha ka Ministry of Home Affairs,” u la ong.
U la ong, kane ka jingpynslem khnang ka pyni ba ka BJP kam don ïa ka jingsngewkhia ïa ka jingdawa u paidbah ïa kane ka mat kaba kongsan na ka bynta ka bha ka miat jong u paidbah ka jylla hynrei ka shu kwah ban leh politik na bynta ka jingmyntoi saiñ pyrthei jong ka.