Myriaw, Rymphang 21: U Myntri Rangbah ka jylla, u Conrad Sangma, u la ong ba ki paidbah kim dei ban khuslai ha kaba ïadei bad ka skhim FOCUS bad FOCUS+, namar ka sorkar kan ai beit îa ki paidbah ïa kane ka skhim.
Haba kren ha ka jingïalang elekshon ha Myriaw na ka bynta ban wer ïa ki paidbah ban kyrshan ïa i Kong Biolinda Lyngdoh, kyrtong jong ka NPP na Mawthadraishan, u Conrad u la ong ba kane ka skhim kan long 5000 na ka FOCUS bad sa 5000 tyngka na ka FOCUS+ bad kadei na ka bynta iwei iwei i dkhot jong ka ïing kiba dei ki nongrep.
“Nga kwah ban ong ïaphi ba ka skhim FOCUS kan treikam biang hadien ka elekshon bad kito kiba ladep ban thaw ïa ki Producer’s Group bad kiba ladep ban ai ïa ki Passbook bad kiwei kiwei ki kot donkam ka pisa kan wan ha ka Group bad kan ki Group kin sa sam sha ki dkhot”, la ong u National President ka NPP.
Shuh shuh u la ong ruh ba ka FOCUS kam dei ka ram kumba la don ba pynsngewthuh bakla, hynrei kadei ka skhim ba la ai ka sorkar na ka bynta ki nongrep ba kin pynbha ïa ka rep ka riang jong ki.
U Conrad u la wan ha kane ka jingïalang kaba la pynlong ha Myriaw ha ka madan kaba ki paidbah ha Myriaw ki ong ka Madan Purno, namar ha ka snem 1989 u Purno Sangma ha ka por ba u long kum u Myntri Rangbah u la wan hiar da ka Helicopter ha kane kajuh ka madan kaba don ha syndah jong ka ïew Myriaw.
U Conrad, u la pynpaw ka jingsngewkmen ba un ïoh ban hiar ha kane kajuh ka madan kaba u kpa jong u, u la wan kumba 34 snem mynshuwa. “Nga dap ka mynsiem ba i Pa jong nga, u la wan ha kane kajuh ka jaka kaba nga la wan mynta ka sngi.
U la kular ruh ba na ka liang jong u, un sa shim ki lad ki lynti ban shna da ka stadium ha kane ka madan kaba mynta ka shu long tang ban ïalehkai phutbol bad kiwei kiwei de ki jingïalehkai.
U Conrad haba wer ïa ki paidbah ban ai ka jingkyrshan ïa i Kong Biolinda, u la ong ba ka sorkar hapoh ka jingïalam ka NPP ka la trei shibun ki kam na ka bynta ka roi ka par jong ka jylla bad u la kren skhem ruh ba ka NPP kan ïalam biang ïa ka jingsynshar sa shisien ïa ka jylla bad ka don ka jingkyrmen ruh ba kan ïoh ban synshar hi marwei.
