Naduh kaba sdang ïakren haduh ban soi ka UDP ka mynjur
Takraiñ u Bah Prestone ïa ka jingleh arsap ka UDP halor ka MoU pynbeit pud
Shillong, Rymphang 21: U National Vice President jong ka National People’s Party (NPP) u Bah Prestone Tynsong ha ka sngi Ba-ar u la takraiñ tyngeh ïa ka jingleh arsap jong ki paralok ba ïa treilang ha ka sorkar MDA ha kaba ïadei bad ka kam pynbeit pud namar ki kular ban pyndam ïa kane ka MoU wat la ki don bynta lang naduh ka sngi kaba nyngkong haduh ka sngi kaba la ïasoi hapdengki ar myntri rangbah ha Delhi.
Haba kren sha ki lad pathai khubor u Bah Prestone u la ong ba ka jingkular jong ka UDP ha ka mat kular elekshon jong ka ban pyndam ïa kane ka MoU lada ka wan ha ka bor, u la ong ka dei ka jingleh arsap namar ka UDP ryngkat kiwei ki paralok kiba don lang ha ka MDA.
“Nga ruh nga kyndit kumba iuh tdong bseiñ ban ïohi ba ka UDP bad kiwei pat ki party kiba donlang bad ngi ki kwah pyndam ïa ka MoU namar naduh kaba sdang ka jingïakren haduh ban da ïakren ïa ka kaiphot jingmih shuwa ba ngin ïasoi noh ïa ka MoU ngi la ïakren ha ka jingïalang ka kynhun Myntri bad ha ka jingïalang jong ka kynhun ki party ba don lang ha ka MDA, bad ka District Council bad wat ki seng bhalang ruh,” u la ong.
“Baroh ki kyndon bad ki mat ki pung kiba ïasoi ha ka MoU la ïa syllok shuwa bad baroh ki party kiba don ha ka MDA ki tip lut namar ngim leh sop sop bad ki ruh ki mynjur lang bad ngi ïa ka MoU,” u la bynrap.
Haba kynthoh ïa kane ka jingleh ki party ha kaba mynshuwa ban soi ïa ka MoU ki la mynjur lang hynrei ynda mynta pat ki la nguid hi la ka prie, u Bah Prestone u la ong ba ka dei ka jingleh arsap kaba khraw jong kine ki party ba don lang bad ka MDA.
“Nga ruh ngam lah pei phang shuh ïa kane, kumno ka UDP ha ka manifesto jong ki ki kular ban pyndam ïa ka MoU. Kane ka pyni ïa ka jingarsap ha ka rukom pyrkhat, ka rukom shimrai hynrei nga sngewskhem ba ki paidah kin sngewthuh ïa kane ka mat,” ong u Bah Prestone.
Haba ïadei bad ka jingkular ka TMC ban pyndam ïa kane ka MoU u Bah Prestone u la ong ba kane ka jingkular ka TMC ka pyni ba kam kwah ba ka jingeh ki paidbah ba sah ha khappud kin kut noh.
“Kine ki party kiba kwah ban pyndam ïa ka MoU ka pyni ba kim kwah ban wanrah ïa ka lad ban pynkut noh syndon ïa kane ka jingïa-kajia pud hynrei ki kwah beit ban neh ha kata ka status quo – status quo – status quo,” ong u Bah Prestone.
“Namarkata ki paidbah ki dei ban husair ïa kine ki party kiba kwah lehkai ïa ka mat khappud bad ïa ki paidbah ba sah ha kito ki thaiñ,” u la bynrap.