Dei tang ka BJP kaba lah ban wanrah ïa ki kam pynroi ba lait na ka bamsap ha Meghalaya

Shillong, Rymphang, 21: U National Spokesperson jong ka BJ u Sambit Patra ha ka sngi Baar ula ong ba ka NPP, ka TMC bad ka Congress ruh ki ngeit ha ka ar naïa bad ha ka jong ka longiing.
U Patra u la kren ïa kane ha ka jingïalang ïalap elekshon kaba la long ha madan Gorkha Pathshala bad ha Golflink haba la sakhi lang da u Myntri Khynnah ka Minority Affairs u John Barla.
Ha ka jingshisha, u Myntri ka tnat Kam Pohing uba dei ban kren ha kane ka jaka um shym la poi satia namarba ka liengsuiñ kam shym la lah satia ban hiar khyndew ha kad liengsuiñ Umroi na ka daw ka jingsniew shaba palat ka suiñ bneng wat hapdeng ki jingpyrshang kiba la bun bun sien.
U Myntri ka tnat Kam Pohing u la pyrshang ban kiew da k ahelicopter na kad liengsuiñ Guwahati khnang ban ïakynduh ïa ki paidbah ha ki jingïalang. Hynrei ka jingthud jong ka suiñ bneng kam shym la ailad satia. U Amit Shah u la shu ai jingkren sha ki paidbah lyngba ka telephone bad kyrpad ïa ki ai ka jingkyrshan ïa ka BJP. U la panmap ruh ba ym shym la lah ban poi bad kular ba un sa wan biang shen.
U Patra u la ong ba ka BJP ka dei tang ma ka, ka seng saiñpyrthei ha ka ri kaba la pynurlong ïa ki jingkular. U la pynkynmaw ruh kumno u Myntri Rangbah barim ka ri u la wan sha ka thaiñ Shatei Lammihngi ar sien kynthih tang ban shu thep ïa ka vote. Katba ha kawei pat ka liang, u Myntri Rangbaduh ka ri u Narendra Modi u la wan jngoh ïa kane ka thaiñ jin 60 sien kynthih bad pynïar ïa ki thapniang jong ka Act East policy ka Sorkar India. Dei ka jingtrei shitom jong u Myntri Rangbahduh ba la pynpaw ïa ka thaiñ Shatei Lammihngi hadien 70 snem ka jingïoh laitluid jong ka ri. Mynta ka North East ka mut, ‘New-Engine’ ka jingkiew jong ka India bad NE hakhmat ka Congress ka dei ka ‘Non-Existent’.
U Patra u la ong ba ka TMC ka dei ka seng saiñpyrthei kaba bamsap na Bengal kaba kwah ban phiah arliang ïa ka Meghalaya bad ban wanrah ïa ki briew. Ha ka sien banyngkong eh hadien ka jingwan rung jong ka TMC ha ka jylli jong ka saiñpyrthei ha Meghalaya, ngi ïohi ïa ki jingïaumsnam ha ka por elekshon. Ka shongsuk shongsaiñ, u la ong ki dei ki thong jong ka BJP ban kyntiew ïa ka Meghalaya bad ngi shahniah tang ha ka BJP ban wanrah ïa kane sha kane ka jylla.
Ha Golflink, u John Barla bad u Sambit Patra ki la sdang ïa ka jingkren da kaba leh burom ïa u durmot jong ka Maria Theisotti bad nguh ïa la ka khlieh sha kiba la san kiba ïashim bynta ha kane ka jingïalang.
Ha kane ka jingïalang, u John Barla u la kren shaphang ki rukom treikam jong ka Sorkar bad ki polisi jong ka u Myntri Rangbahduh ka ri hapoh ka jingsynshar jong ka sorkar BJP. U la ong ba dei tang ka BJP kaba la pynkupbor ïa ki riewlum bad ïa ki ritpaid jong ka jylla bad ka ri bad kam ju thmu ban pynlong ïa ki, kiba shu ap kumba la leh da ka Congress.
U la ong ba kane ka dei ka jingangnud jong ka BJP ban pynthikna ba ki briew kiba shah ieh beiñ dei ban ïarap bad ban pynkupbor nyngkong eh, bad ban pyntreikam ïa kane ka jingthmu, ka BJP kam shym la wanrah ïa ka jingsngewpher hapdeng ki paidbah halor ka nongrim jong ka rta, ka jinglong shynrang ne kynthei, ka niam, ka jinglong jaitbynriew bad kiwei kiwei.
U John Barla u la ïathuh ruh shaphang u Myntri Rangbahduh ka ri u Modi uba la kyntiew ïa u sha ka kyrdan kaba u la bat mynta.
U Barla u la ong, dei u Narendra Modi uba la sdang ïa PM-DevINE scheme bad mang pisa T. 6,000 klur na ka mang tyngka jong ka Sorkar pdeng. Kam shym la don ka jingpynsangeh ïa ka jingpyllait pisa na ka bynta ki kam pynroi ha Meghalaya. Kumba 2.10 lakh tylli la pynïoh tyndong lyer shet ha Meghalaya lyngba ka PM Ujjwala Yojana, kumba 70 hajar ki longing la shna hapoh ka PM Awas Yojana, kumba 3.40 lak tylli ki iing la pynïoh umbam lyngba ka Jal Jeevan Mission bad kumba 2.70 lak tylli ki paiñkhana la shna.
Kumba 2 lak ki nongrep ha Meghalaya ki la ïoh jingmyntoi lyngba ka Pradhan Mantri Kisan Samman Nidhi. Hapoh ka PM Garib Kalyan Anna Yojana, kumba 22 lak ngut ki paidbah ha Meghalaya ki la ïoh ei 5 kilo u kew/khaw bad shi kilo u shana na ka bynta ar snem shiteng.
U la bynrap ha ka por ba ka khlam covid, katba kiwei kiwei ki seng saiñpyrthei ki la jahrngai nakhmat jong ki paidbah, hynrei dei tang u Modi uba la ieng ha syndah jong ki paidbah bad ai marbam ei bad ka dawai injek.