Kiar u Chief Minister ban ïa kynduh ïa u Amit Shah

Babu Kular Khongjirem

0

Ha kine ka taiew elekshon, ngi ïohi ba u Chief Minister bad u Deputy Chief Minister ka sorkar MDA ki la pyrshang pynban ban leh kiar ne phet krad rai maw rai dieng na u Union Home Minister ka Sorkar India u Amit Shah. Ha kito ki bnai ba ladep pat, ngi ïohi ba ka jingkwah ïa kynduh jong ki ïa u Amit Shah ka la long shaba palat liam. Kim banse ban leit sah miet da ki taiew sha Delhi tang ban ïoh ïa kynduh ïa u Amit Shah tang ban ïoh pynthymme ïa ki paidbah Meghalaya jong ngi ban pynpaw ba ki kitkhia shisha ïa ka mat ILP bad ka jingpynrung ïa ka ktien Khasi ha ka Khyrnit Baphra ne 8th Schedule kumba la rai ne mynjur da ka Assembly nalor bun kiwei pat ki mat ba kongsan kiba ktah ïa ka ïap ka im jong ka ri bad jaitbynriew jong ngi.
Ha kito ki bnai, ngi ïohi ruh ba u Chief Minister, u Deputy Chief Minister lem bad ki kynhun Minister ka Sorkar MDA ki la ïa pyllut por bad pyllut pisa lah jhor tang ban leit Delhi ban leit ïa kynduh ïa u Amit Shah. Hynrei, kaba phylla pat mynta ka long ynda u Amit Shah u wan ha Tura kaba dei ka jaka sah u Chief Minister, u Chief Minister u phet krad pynban ha ka jaka ban ïakren ïa syllok ïa ki mat ba kongsan jong ka jylla kum ka ILP bad jingpynrung ïa ka ktien Khasi bad Garo ha ka khyrnit Baphra.
Ynda u wan sah miet lei hangne ha Shillong,ym don satia ki Minister kiba kwah pynsngew ïa kata ka ishu ILP, ka Ktien Khasi bad ki ïa phet krad pynban na u wat tang ka syrngiew jong ki ruh ym ïohi satia.
Hangne u paidbah u la sakhi shuh shuh kdar ïa ka jingleh mynleh jong kine ki nongïalam jong kane ka sorkar MDA ba la ïalam da ka party NPP. Ïa ki ishu ba donkam jong ka ri bad ka jaitbynriew kim nud saham pleng hakhmat u Modi lane u Amit Shah haba ki wan shane sha ri lajong. Ki kwah ban pynheh iew pynban da kaba leit ïa kynduh pat ïa u sha Delhi ynda ladep ka elekshon syndon.
Kaei ka jingmut ba sha lyndet jong kane ka jingthmu jong ki,ym lah mutdur shuh. Ki dei pleng, tang ‘ki khleiñ la thang jwat la bam’. Ki dei ruh tang ki ksan rympei rem dorbar kiba shu byrngem bad khleiñ tang na rieh na rieh. Ki kyrhuh kum u ‘Laren (pyrthat rkhiang) khlem da dum slap satia.
Lada ki paidbah kim sngewthuh shuh ha kane ka kynti ba mynta bad ba kin dang ïai ngop biang ha kum kine ki nongïalam khawpud jong ngi ha ka 27th February 2023, khlem pep kin ïalam syndon ïa ka ri bad ka jait bynriew jong ngi sha nurok ka ksew ne ka dujok kumba ong ki riewstad.

Leave A Reply

Your email address will not be published.