Shillong, Rymphang 21: Ki paidbah nongleit nongwan ha kine ki sngi ba mynta ka la mad jingeh shibun namar ba ki kali kamai kiba bun la bat noh da ki Party bad ki Kyrtong kiba ïakhun ïa kane ka elekshon MLA 2023.
Ki paidbah kiba leit ba wan ki la hap ban ap kali sah harud surok da ki bun bun kynta tang ban leit na ka jaka kaba khamjan ruh.
Sah satang saw sngi ban kut ka jingïalap elekshon, kiba bun ki kyrtong sha ki jaka nongkyndong, ki la leit ïalap elekshon na kawei ka ïew sha kawei pat ka ïew bad ha kane ka jingleit kanbas jong ki sha ki ïew, ki da kit briew ruh da ki spah sngu ban pynshngaiñ lem ïa ki bad khamtam eh ban pyni ïa ka jingbun briew.
Dei kane kaba la pynlong ïa ki kali kamai ki duna bad bun ki la kit briew sha ki jaka leit ïalap elekshon.
Ki don ruh ki kyrtong bad ki party kiba ym tang ba ki la bat ïa ki kali tang na nongkyndong, hynrei kiba bun ruh ki la bat kali na Sor Shillong ban wan kit briew na kylleng kylleng ki shnong ban leit sha ki jaka ïalap elekshon.
