Nongpoh, Ïaiong 25: Ka Ophis ka District Disaster Management Authority ka Ri Bhoi mynta ka sngi ka la sam da ki tiar ki tar ban ai jingïada haba wan kano kano ka jingshah lynshop ha ka bor mariang ne kiwei kiwei ki jingjia, kaba dei hadien ba ki la pyndep ïa ka jingai jinghikai kaba 12 sngi katkum ka prokram ba la tip, ‘ Up-scaling Aapda Mitra Scheme ba la beit tyngka da ka sorkar India.
Ïa kine ki tiar la sam sha ki samla ha ka jingïalang kaba la long mynta ka sngi ha District Library Auditorium Hall, Nongpoh. Kine ki tiar ki tar ba la sam sha kitei ki samla (Volunteer) ki dei kita ki Emergency Responder kits ba la atip ha ka ktien nongwei bad lyngba kitei ki tiar ki tar ba la sam kitei ki samla kin lah pat ban ai jingïada ïa kiwei haba wan lynshop kano kano ka bor mariang ba ki hap ban ai jingïada ïa ki paidbah.
Kitei ki tiar ba la sam sha ki samla jong ki 100 tylli ki Shnong ha Ri Bhoi ki kynthup naduh ka jacket, torch light, ki uniform bad kiwei kiwei ki tiar kiba la pynbit pynbiang lypa da ka sorkar kum kita ki volunteer ba hap ban ai jingïada ïa ki paidbah.
U Deputy Commissioner ka Ri Bhoi, u Arpit Upadhaya u la wan ban shim bynta kum u kongsan bad la sakhi lang ruh da ka jingdon lang u Additional Deputy Commissioner ka Ri Bhoi, u Bah M.B Tongper, u Dr. Abhishek Saini, Assistant Commissioner ka tnad Disaster Management, ka Kong K. Waniang, District Disaster Management Officer bad kiwei kiwei de.
Haba kren ha kane ka sngi, u Deputy Commissioner ka Ri Bhoi, u Arpit Upadhyaya, u la ong ba ki Aapda Mitra Volunteer ki dei kita ki kynhun kiba hap shim ïa ka jingkitkhlieh ban ai jingïada nyngkong ïa kino kino kiba shah ktah ha ka bor mariang ne kiwei kiwei ki jingjia kiba lah ban ktah ïa ka jingim ki briew.
U la ong ruh don shibun ki jingjia ba sngewsih kum ka jingshah ktah ha ka bor mariang kaba ktah ïa ka jingim ki briew bad ka dei pat ka kamram kine ki kynhun ba ki hap ban shim ïa ka jingkitkhlieh kumno ban ai jingïada mardor haba don kum kitei ki jingjia.
Shuh shuh, u la ai mynsiem ruh ïa kine ki samla ba la pyndep ïa katei ka prokram ai jinghikai bad khamtam ba ki la ioh pdiang ïa kitei ki tiar ki tar bad kum ki samla ba la ioh jinghikai ki hap ban don kata ka jingkitkhlieh ban ai jingïada lada don kano kano ka jingjia ba sngewsih kaba lah ban ktah na ka bor mariang ne kiwei kiwei ki jingjia ba sngewsih kumba ki la ioh jinghikai, u la bynrap.
