Suba jur ka KSU ba ka don beit ka jingwan rung ki Bangladeshi na ki khlaw Kuliang

Khliehriat, iaiong 25 : Ka Khasi Students Union Narpuh Circle, ka la pynpaw ka jingsngew bitar bad sngewkhia jur halor ka jingiohlad ki mynder ri kiba na ri Bangladesh kiba wan rung tuh sha ri India kumba la jia ha ki por ba la leit, ha kane ka kynti ruh, ka seng ka suba jur ba ki don ki briew kiba da ka kynhun kiba la ïoh ban wan rung tuh sha ri India, lyngba ka khlaw kaba don ha Kuliang bad ruh da kaba ki jam na ka wah ‘Apha’ kaba na shnong Kuliang.
Ki nongïalam ka seng ki la ïoh ïa ki video ba ring ki briew jong ka thaiñ, kiba la ring ïa ki shi kynhun ki briew kiba ïaid na kawei ka lynti khlaw ha Kuliang hajan ka wah Apha bad ka seng ka suba jur ba ki lah ban dei ki nong Bangladesh kiba thmu ban wan rung sha East Jaiñtia Hills District, na ka liang ka seng ka ïoh jingtip ruh ba ki don haduh kumba ar ne lai tylli ki kali sumo kiba la ieng ap lypa ha surok National Highway ha Kuliang , kiba thmu ban kit ïa ki dkhar bangladesh.
Ka seng ka suba jur ruh ba ki lah ban don ki dalal kiba ju ïarap ba pynpoi ïa ki dkhar Bangladesh lyngba ki lynti khlaw bad la suba ba ki don ruh ki dalal kiba napoh ka jylla kiba ju ïarap ban pyn poi ïa ki sha East Jaiñtia Hills District, kiba ju pynbiang ïa ki kali ban kit ïa ki nong Bangladesh, la ong ba na ka liang ka seng ka ïai long peitngor bha ïa kane bad kan wad bniah ruh ïa kiba leh dalal bad lada lap ïa ki dalal ne ki nong Bangladesh kiba leh beaiñ bad rung beaiñ, ka seng kan ai da kaba tyngeh ‘Ngi hap ban shim khia ïa kane, namar ngi suba ba ka jingwan rung ki nong Bangladesh sha East Jaiñtia Hills District ka don beit man ka por” ong u Vice President KSU Narpuh, u samla Phanuel Tongper.
Ki nongïalam jong ka KSU Narpuh Circle, ki ïathuh shuh shuh ruh, ba ki nongrep kiba don ha ki thaiñ khappud, kum ha Kuliang, ha Umkiang, kiba ju leit rep bad leit khwai dohkha sha katei ka wah Chka Wah Pha, bunsien ki ju sheptieng bad sngew syier haba ki ïohi ne lap ïa ki dkhar kiba suba ba ki dei ki nong Bangladesh, kiba ju ïaid da ka kynhun na ki lynti khlaw kiba don hajan ki jaka rep jong ki, hajan ka wah, kim ju nud ban ong eiei bad kim ju nud ban peit ïa ki ruh namar ki sheptieng.
Shuh Shuh, na ka liang ka seng, ka pynpaw ka jingsngew lyngngoh ïa ka jingbym lah ki bor sorkar ban weng ïa ki shipai Border Security Force, kiba ju ieng ap pahara ha surok national highway ha Sonapur bad ong ba ha ka jingshisha, ka kamram jong ki shipai ïada khappud ka dei ba kin don sha ki jaka khlaw ban ïada bad ban tehlakam ïa ka jingwan rung ki bar ri kiba na kawei pat ka ri, hynrei la buh bad pyn ap pahara pynban ha surok national highway ka bym don jingmut eiei ruh, kumta ka seng ka kyntu ïa ka sorkar ba ka dei ban phah noh ïa kine ki shipai ïada khappud ba ki dei ban leit pahara sha ki jaka khlaw ba khappud bad ka ri Bangladesh, ym ban wanrah sha ki jaka sor ne ki surok national highway, ban pynthut pynban ïa ka leit ka wan ki para doh para snam bad pynsyier ïa ki kynthei khynnah.
Ha kajuh ka por, ka seng, lunga u Vice President, KSU Narpuh, ka pynpaw ka jingsngew khia, ïa ka jingtlot ki bor pahara jong ka Umtyra Infiltration Check Point, kaba don ha shnong Umtyra, ka bym lah ban lap (detect) ïa kine ki dkhar Bangladesh kiba wan rung tuh shapoh ka district, namar kine kiba rung tuh na ki khlaw na Kuliang kim dei shuh ban ïaid lyngba ïa ka Infiltration kaba na Ratacherra te ki hap ban ïaid lyngba pat na ka Infiltration jong ka Umtyra Check Point, ka seng ka kyntu jur ïa ki check poit ba kin peitbha ïa kino kino ki briew kiba suba ba ki dei kiba wan na bar ri kum na Bangladesh kiba wan rung tuh sha ri India bad bust hapoh East Jaiñtia Hills District.