Pynlong prokram ka Bethany Society Phramer Unit halor ka hok ki khynnah ba duna dkhot met

Jowai, ïaïong 25 : Ka Bethany Society Phramer Unit da ka jingkyrshan lang ka Jan Vikas Samiti, Varanasi kila pynlong ïa ka prokram “We Ring the Bell Campaign” kaba la pynlong ha kane ka 20 tarik mynta u bnai ha Kyndong Tuber RCLP School bad kumjuh hynnin ka sngi 24 tarik ha St Claret Secondary School Hall Phramer WJHD.
Baroh ar kine ki prokarm la wan ban ïashim bynta lang da ki skul kiba pher bapher ha ryngkat ki khynnah, ki nonghikai bad ki Head Teacher jong kitei ki skul ka thaiñ.
Ka jingthmu jong kane ka prokram ka long shi bynta ban ïarap ai jingtiplang baroh ki khynnah ba don ha ki jingduna dkhot met ki dei ban lem ka jingnang jingstad kumba long lem kiwei da kaba pdiang sngewbha ïa ki ha kino kino ki skul kiba don ha kylleng ka pyrthei bad ïa kane ka prokram la pyntreikam naduh ka 2012.
Ha kane ka 24 tarik ïa kane ka prokram la sdang shwa da ka jingïaid rally ba la shim bynta da ki khynnah skul bad ki nonghikai jong ka St. Claret Secondary School, Shangpung District Presbyterian SSA School, Zion English School bad ka Oasis English School bad kumjuh ka jingïasoi ha ka banner.
Ha kane hi ka sngi u ma Baristerwell Niang Block Development Officer (BDO) bad ka kong D. Lathong, Block Mission Coordinator (BMC) kila wan ban ïadonlang ha kane ka prokram bad ha ka juh ka por kila ai jingkren ruh halor ka hok jong ki khynnah kiba duna dkhot met katkum ka kyndon act 2016.