Sah khanapateng ka jingwan u Vice President namar ngi sngewshngaiñ ba don ki nongpeit: CM

Shillong, Nailur 07 : U Myntri Rangbah u Conrad K Sangma ha ka Lah Sngi U Blei ula ong ba kane ka jingwan jong u Vice President ka Ri India ha ka sien ba nyngkong eh sha Meghalaya kan dei ka ban sah khana pateng ha ka histori ka Jylla.
Haba kren ha ka jingïalang buh mawnongrim ïa ki 5 tylli ki project ha Shillong, u Conrad ula ong ba kane ka jingwan ka pynlong ïa ki paidbah ka Jylla ban sngew ba ki ïoh bynta lang bad ki long kiba kongsan hakhmat ka ri.
“Nga ai ka jingpdiang sngewbha ïa u Vice President ha kane ka jingwan ha ka sien ba nyngkong eh sha Meghalaya. Ka jingwan jong phi mynta ka sngi kan dei ka ban sah khana pateng ha ngi. Ka pynlong ïa ngi ban sngew ba shah kynthup lang, ka pynlong ïa ngi ban sngew ba ngi long kiba donkam, ka pynlong ïa ngi ban sngew ba ki nongïalam jong ngi ki khmih lem ïa ngi. Kane ka dei ka jingsdang jong kiba bun ki jingwan ïuhkjat bad ka jingïadei kaba khlaiñ hapdeng ka Jylla jong ngi, ki briew jong ngi bad ma phi” ong u Conrad.
Ula ong ba kane ka jingïadei ka sdang naduh ka jingïalong paralok hapdeng u Vice President bad u (L) PA Sangma ha ka por ba baroh arngut ki dang long ki dkhot jong ka samoi ba 12 bad 13 ka Lok Sabha.
Haba pynpaw ba ka Meghalaya ka la kynjoh 54 snem mynta, u Conrad ula ong ba ka Jylla ka la sakhi ïa bun ki jingkiew ba jinghiar hynrei ka bor ba khlaiñ duh jong ka, ka dei ka imlang sahlang, ki lehniam leh rukom na la tynrai bad ka jinglong tynrai kaba la don wat hashuwa ka synshar khadar ba mynta.
“Ha kine ki phra snem, da ka jingkyrkhu ka Sorkar Pdeng, khamtam u Myntri Rangbah Duh u Narendra Modi, ym tang ka Meghalaya hynrei baroh kawei ka thaiñ Shatei Lam Mihngi ki la kylla dur” ula ong.
U Conrad ula ong ba ka don ka por ba ka Meghalaya ka la paw shatrai duh ha ki jingai kyrdan hapoh ka Ri hynrei, ka jingpyrshang ba khlem sangeh, ka jingïohi jngai, ka jingïatreilang kum ka kynhun, ka jingtrei shitom ki samla, ka jingtrei jong ki SHG ki kynthei bad ki nongrep ki la pynkylla lut ïa kane.
“Mynta ka Meghalaya ka dei kawei na ki Jylla ba kiew sted bha ha ka ïoh ka kot hapoh ka Ri kaba kot jan kumba 12.8%, kaba long kaei kaei ka bym lah ban poi pyrkhat ha ki 10 snem bala leit noh” ula ong.
Hynrei ula ong ba ïa ka jingkiew shaphrang yn ym lah satia ban thew tang da ka GSDP.
“Ha ngi, ka jingkiew ka ïoh ka kot ka dei ban thaw ia ki lad ki lynti na ka bynta ki samla, kyntiew ïa ka ïoh ka kot ki nongrep ban nang pynbha ïa ki lad ki lynti ha ka koit ka khiah. Kam long kaba lah ban pdiang ba wat haba ngi kiew, ki kmie kin duh noh ïa la ki jingim haba kha khun” ula ong.
U ong ba ka Meghalaya ka don ïa ka MMR ba palat 250, kaba long arshah ïa ka national average, hynrei mynta la lah ban pynhiar sha ka 55%-ka jinghiar kaba heh duh hapoh ka ri.
Halor ka pule dangle, ula ong ba ka Jylla kala kiew na ka 410 point ha ka Akanshi-III, kaba rit duh ha ka PGI Index, sha ka palat 520 ha ka Akanshi-I tang hapoh arsnem, kaba dei ka jinglehbha kaba heh duh da kino kino ki Jylla.
U Conrad ula bynrap ba watla ka Jylla kala beh shakhmat ïa ka jingkiew irat, hynrei kan ym klet pat ïa la ka jong ka tynrai, ka kolshor bad ka jingithuh ba kyrpang.
“Ngi don shibun ki jingeh, hynrei lada ka imlang sahlang ka ïatreilang, ngin kynjoh ïa ka thong jong ngi ban pynlong ïa ka Meghalaya kawei na ki Jylla ba don ha ka kyrdan top ten” ula ong.