New Delhi, Jymmang 20 : Ka India kaba dei ka trai jaka ka la shah pynïakap ha ka Group A jong ka SAFF Championship 2023, ha ryngkat ka Kuwait, Nepal bad ka Pakistan, ha ka jingïalang pynïakap ïa ki team ha ka sngi Balang.
Ïa katei ka draw la ïoh ban pynlong ha ka jingïadonlang ryngkat u President jong ka All India Football Federation (AIFF) u Kalyan Chaubey, General Secretary jong ka South Asian Football Federation u Anwarul Huq, bad u Secretary General ka AIFF u Dr Shaji Prabhakaran.
Ka Lebanon bad ka Kuwait kidei ki a tylli ki team kiba dei na shabar jong ka South Asia, kiba ïashim bynta lang ha katei ka lympung. Phra tylli ki team kin ïakhun na ka bynta ka South Asian kaban long ha Bengaluru, kaban sdang naduh ka 21 tarik Jylliew katba ka phainal kan long ha ka 4 tarik Naitung ha Bengaluru.
Ka India, kaba dei ka nongpdiang pynlong ïa katei ka tournament, ka la don lypa ha ka Group A katba ka Kuwait, Nepal bad ka Pakistan ki la ngat lang hadien ka jingpynïakap ha ka sngi Balang. Ha ka Group B, ka Lebanon, kadei ka team kaba don hakhlieh duh tam, bad ka don ruh hakhieh duh na ka Group, ha ryngkat ka Maldives, Bhutan bad ka Bangladesh.
“Nga ai khublei ïa ka South Asian Football Federation (SAFF) kaba la sngap ïa ki jingkyrpad jong ngi ban khot sngewbha ïa kiwei pat ki ri kiba na shabar jong ka South Asian ban ïashim bynta ha kane ka Championship. Nga sngew ba ka jingdon jong ka Kuwait bad ka Lebanon kan nang ïarap ba kane ka Championship kaba kham khlaiñ shuh shuh, bad nga ai khublei sngewnguh ruh ïa ka SAFF kaba la sngew la sngap bad kaba la shimkhia haloe kane,” ong u Chaubey.
“Na ka liang ka SAFF, da kaba burom nga shim ïa kane ka kabu ban pdiang sngewbha ïa baroh ha Delhi ha kane ka jingïalang pynïakap ïa ki team. Mynta ka sngi, ngi sakhi ka jingsdang jong ka jingïaid lynti ka jingïatylli jong ki ri. Ka SAFF kadei ka nongkit tien syiem ba ka bynta ka jingïatylli jong ki ri kane ka thaiñ ban pynlong ka jingïalehkai sport kaba bit ba biang, bad ngi dap da ka jingsngewkmen ban wanrah lang ha kajuh ka rynsan ïa baroh ki ri,” ong u Huq.
Ka SAFF Championship 2023 kan sdang ha ka 21 tarik Jylliew, h akaba ka Kuwait kan ïakhun pyrshah ïa ka Nepal ha Bengaluru, bud pat sa ka jingïalehkai hapdeng ka India pyrshah ïa ka Pakistan ha katei kajuh ka sngi.
Ha ka Group B ka jingïalehkai kan sdang ha ka 22 tarik Jylliew ha kaba ka Lebanon kan ïakhun pyrsdhah ïa Bangladesh ïalehkai kaba nyngkong jong katei ka sngi, katba ka Maldives kan aireng pyrshah ïa ka Bhutan. Ki ar tylli ki team na kawei ka group kin ïoh rung sha ka semi-finals, kaban sa pynïalehkai ha ka 1 tarik Naitung, katba ïa ka jingïakhun phainal yn sa pynlong ha ka 4 tarik Naitung.
