23 tarik yn sdang shah thngan u Bah Ardent hakhmat Secretariat

Shillong, Jymmang 19: Namar ka jingkyntait ka sorkar ban ïakren halor ka jingdawa pynbeit ïa ka Reservation Policy, u President jong ka VPP, u Bah Ardent Miller Basaïawmoit, un shong shah thngan khlem pud hakhmat Secretariat naduh ka 23 tarik mynta u bnai.
U MLA Nongkrem uba la pynbna ïa kane hakhmat ki hajar hajar ngut ki paidbah kiba la wan ban kyrshan ïa ka VPP ha ka jingdawa jong ka ban pynbeit bad pynbha noh ïa ka Reservation Policy.
“Ngan la rai ban kohnguh ïa ka jingphah jong ka Seng ban leit shah thngan hakhmat Secretariat kum ka jingbteng ïa ka jingïakhih halor ka Reservation Policy”, la ong u Bah Ardent hapdeng ka jingpyrta u paidbah, “Ngi ruh ngi ruh ngin wan lang”.
Na ka liang ka Seng VPP kaba la phah ïa u Dr. Ricky Syngkon, General Secretary ka Seng, u Dr. Kara Shen, Vice President bad u Dr. Batskhem Myrboh, Nongaiktien ka Seng, ka la muh jyndat noh na ka jingïalang namar ba ka jingïalang ba la khot da u Myntri Rangbah kam shym la ïakren halor ka Reservation, hynrei la ïakren tang ïa ka Roster. “Ngim don jingeh ïa ka Roster lada la pynntreikam nangne shakhmat, hynre ka jingeh baroh kadei na ka Reservation kaba lah shiliang”, la ong u Dr. Bastkhem. U la ong ruh ba khlem da lah pynbeit shuwa ïa ka Reservation lada pyntreikam makna ïa ka Roster ki jingeh jong ki Samla Khasi kan dang don beit, kan nym jah.
Hadien ba la wan ai jingtip kine ki lai ngut ba leit sha ka jingïalang, u Bah Ardent haba kren sha ki paidbah, u la ong ba ka VPP da lei lei kan nym pyndem na ka jingdawa ban pynbeit ïa ka Reservation namar ba kadei ka daw tynrai jong ka jingeh ki Samla wad kam wad jam.
U la ther ruh ïa ki MLA kiba haduh mynta ki dang shah hikai skul ha u Conrad halor ka Roster bad ka jingbym treh jong ki ban ïakren ïa ka Reservation Policy kadei namar kiba bun kim pat sngewthuh ïa ki kyndon treikam jong ka.
U la ong ka Policy kaba la thaw da ka sorkar ha ka snem 1972, ka kyndon kaba saw ka shah ban thungkam ha kino kino ki tnad treikam sorkar lada jia ba kawei ka jaidbynriew kam lah ban pyndap ïa ka 40% kaba la mang na ka bynta jong ki. Ha ki snem kiba ladep, haba ki paralok Garo kim shym la don ki briew kiba biang ban thungkam, la thung ïa ki Khasi katkum kane ka kyndon. Hynrei lyngba ka Roster kiba la pyntreikam da ka sorkar MDA ha kane ka rukom ba mynta kiba bun ki Samla kin duhkam noh, namar hap ban pyndap ha ki jaka kiba ki paralok na Garo kim shym la ïoh ha kine ki sanphew snem baladep.
U Bah Ardent la pynshai ba ka jingtieng ki katto katne ba lada pynkhih ïa ka Reservation Policy ka lah ban shah ktah ka jingmang percentage ha ka jylla kadei tang ka jingbym tip bad ka jingkren kulmar jong ki, namar ha ki jylla riewlum lah ban mang palat ïa ka 50%. “Ha Nagaland bad ha Mizoram la bhah palat ïa ka 50% ha ka thungkam namar ba kidei ki riewlum, kumne ki katto katne ki wan batai stad”, la ong u Bah Ardent.