Ka jingkoit jingkhiah ka dei shisa ka spah kaba ka ktien nongwei ka ong “Health is Wealth”, ym lah ban len ba dei tang kito kiba don ia ka met kaba koit kaba khiah ki lah ban ioh ruh ia ka rta kaba jlan kaba ki lah ban im tymmen bad shongpdung shongprah. Ka longiing ka ba don ia ki riew tymmen ka long ka iing kaba shngain khamtam lei haba don ki tymmen kiba riewblei bad kiba dap ka ki kyntien snem kyntiew kraw bad bunsien ki jingkren jong ki riewtymmen ki ju long ki jingkyrkhu.Ym lah ban len ia ka jingshisha ba kum ki briew hi bun ngim kwah ban tymmen noh ne duh noh ia ka bor jong ka jingshait jingkhlain. Namar haba la tymmen la hiar lut ka por ka sor bad la tlot ka met ka phad bad bunsien wat hap ruh ban mad ia ka jingeh kiba bun lada ioh ia ki khun ki ksiew ki bym sngewthuh. Ka jingioh ka ka rta kaba jlan ha ryngkat ka jingkoit jingkhiah ka long ka jingkyrkhu khraw ha ka jingim.
Hato kam dei, ba ka jinglong tymmen kaba koit ba khiah bad kaba suk ba sain ka dei ka jingai ba kyrpang jong U Blei. Ka por jong ka jinglong tymmen ka dei ka por kaba donkam ban pynpalei shuh shuh ia la ka jong ka jingim bad ban pynkhuid ia ka. Hooid, yn lah ban len ba ha ka jinglong briew wat ha ka rta kaba la palat ia ka 60 snem ruh ki jingpynshoi bad ki jingeh ki dang trei, la bynrap uwei iwei u riew rangbah.Kum ki riew tymmen ka long kaba donkam ban pynkynmaw pat ba ka la dei ka por ban peit sha ka thong jong ka jingpynjanai bad jingpynkhreh ban leit phai noh sha la U Nongthaw (Blei). Kane ka dei ka bynta ha kaba kumno kin lah ban pyrkhat shaphang jong ka Bneng kata kaba baroh ki don ka jingkyrmen ban ioh shongthait ha ka.
Khyndiat eh na ngi, ngi shemphang shaphang kata ka Bneng kaba baroh ngi ngiet ka dei ka jaka sah jong U Blei. Hynrei bun ngim ju iitbniah shaphang jong ka bad ngim don por hi ruh ban kren shaphang jong ka. Lehse ha ka rta kaba la noh ne ka jinglong tymmen kam long kaba suk ban dang pule bad ban iit bniah ia kiei kei kiba kordor kat ka Bneng, pynban katno ka long ba la kyrkhu ia kito kiba la im ka jingim ban pynlut khyndiat ka por ha ka por ba ki dang samla ban tip bad ban iit shaphang kane ka jingshisha. Ha ka ktien kaba ngi pule paidbah mynta na ka bynta ka jaidbynriew Khasi ngim don da kawei pat ka jingthoh ban batai shaphang ka Bneng, hynrei ka Bible ka dei kawei bad lehse tang maka hi ka kot kaba batai shaphang kane. Ki long kiba la kyrkhu kita kiba la pule bad tip ia kane kawei ka jingshisha.
Ka rta kaba la tymmen kaba dei ka rta jong ka jingpynkhreh ia ka jingleit phai pat noh sha la u Nongthaw, ka long thik kum kito kiba thmu ban leit jingleit sha jngai bah ne ki nongleit pilkrim. Ki nongleit pilkrem kim ju shu leit khlieh biej kumto hynrei ki pynkhreh ia lade ban wad ia ki jingtip kiba biang shaphang kumno ba kin leit sha ka jaka kaba ki thmu. Ki iit bniah haduh ki jaka sah ne ki hotel kiba kumno kiba biang dor bad iaha bad ki, ioh ba ki rem palat kin ym lah ban siew. Ki jaka kiba kumno kiba ki donkam ban leit jngoh, ki kali, rel, ne liengsuin kiba kumno kin shong bad kumta ter ter. Katno tam ka long kaba donkam ban iit bniah ia kata ka jaka kaba baroh kin leit bad ban ym wan phai shuh syndon hynrei ban shong sah junom.
Ka Jingrwai sngewsynei 3:27 ka ong ” Kaba bha ia u briew ban kit ia ka lyngkor haba u dang samla” bad U Issiah 46:4 ” Te haduh ka jinglong tymmen …bad haduh ban da phuh niuhlieh ngan kit iaphi…” Ka ktien U Blei ka hikai ruh ba kumta ba ngi bet kumta ngin ot.. ka long kaba shisha ba lada ngi la shim khia ia ki sngi ka jonglong samla ban iit ia ka bneng bad pule shaphang jong ka, ka por tymmen kan long beit ka jingap kyrmen bad ngim tip biang biang shano kin leit ha kaba kut jong ka jingim jong ki. Ka long lehse kaba eh ia kiba bun kiwei pat ki tymmen ki bym tip ei ei shaphang kane, hynrei lada ki don ia ki khun ki kti kiba shemphang, kiba stad bad kiba tip ia ka ktien U Blei, kan long ka jingiarap kaba khraw ia ki tynmen bad kin lah ban pan jingiarap ia ki. Lada ki la dep long ki samla kiba stad kumba ong u nongrwai sngewsynei ba lada ngi la kit ia ka ktien U Blei ha ka por ba ngi dang samla, kane hi kan kit pat ia ngi ha ka rta kaba ngi la tymmen ba pynkhreh ban leit phai noh sha la u Nongthaw. Ka jingim ki tymmen kiba ieit ia U Blei ka long ka jingim kaba kmen bad kaba pyndonburom ia la u nongthaw wat shuwa ban kin khlad noh na kane ka pyrthei ruh.
