Hato U Blei u don shisha ?

Scholar Lawriniang Nongthliew, West Khasi Hills

0

Ha kane ka juk kaba ngi im mynta, ka juk kaba la palat liam ka jingstad u khun bynriew bad bun byllien ki riewstad (Scholar) ki pynlut por ïalade wat ban wad (Research) ïa ka khmat U Blei ban lap haei U Blei u shong?. Kumta ki la wad lyngba ki kor ki bor (Technology) wad bniah jong ki lane ki la leit kiew sha ka haw haw lane sha ki met bneng ki ngam sha ka duriaw sha ki krem ki kroh ban pynlut ïa ka por jong ki bun bun snem ban wad haei U Blei u shong, hynrei kim shem satia.
Haba kim shem bun ki pynbna bad ki ong ba kiba ngeit bad kiba ong ba don U Blei ki dei tang ki ba ngeit bieit suda bad dei kiba la shah pynsngewthuh bakla noh hano re hano. Kumta ki ong ba kane ka pynpaw ba ki briew ki dang sah ha ka jinglong rim kum mynshwa ha ka por u shrieh u tngaw. Namar ki stad pyrthei ki ngeit ba ïa u briew u kylla na u Shrieh.
Shisien ar ngut shi paralok kiba ïa ieit thep mynsiem bha naduh dang khynnah rit naduh ba dang leit skul, ki ïa shong kajuh ka klas bad ki ïa shong kajuh ka ben, la ong ba kine ki khynnah kim ju ïa lait lok u wei ïa uwei bad tang ha ka por miet ki ïa khlad lok bad ki dei ruh ki khynnah ba smat bha sha jingïaseng khynnah step. Uwei u dei u khun ba kham biang kham bit hynrei uwei pat u dei u khun ba duk.
Kumta kine man ka sngi ki ïa im lang kumne ym ju ïa shun ym ju ïa mai ym ju ïa bynnud kaei kaei ba don ïa bam lang ïa sam lang. Ka por ka ïaid sted khlem lap ïoh sngew kine arngut ki la pyndep ïa ka matrik bad ha shnong bym pat don kolej (College) ki hap ban leit pule shabar na shnong kane ka la dei ka por ba ki hap ïa khlad lok noh.
Kumta haba ki la leit pule ha la ka jaka u ne u ba duk u pule tang katto katne por u la leit pule mishonari (Missionary) noh ban ïalap shaphang U Blei. Hynrei u ne uwei pat u ba biang ba bit na ïing ki kmie ki kpa ki la phah pule Saïantis (Scientist) noh sha bar ri. Hadien katto katne snem ha ba u la pyndep ïa ka jingpule Saïantis u la long u briew u ba stad bad bna nam bha ka pyrthei ha ka jingstad jong u ban wad bniah ban lap ban shem ïa kiei kiei baroh. Ka pyrthei ka ju bna ïa ka nam bad khana tang shaphang jong u.
Hadien kumba katto katne snem u la mut ban wan phai sha la shnong, kumta ka jingpynkhreh pynkhrum ka la long kaba palat shisha namar ban wan u Saïantis bna nam ka pyrthei. Ha ka sngi ba u wan ki la ïa ap ki kynrem ki lyndan bad ka jingïatuid ki briew ki ba ap ïa u da ki phew hajar. Bad na ka liang u ne u paralok mishonari ruh u la leit ap lang ban ïa kynduh ïa la u lok ba ieit eh.
Ynda haba kine shil ok ki la ïakynduh ki la ïa khublei ïa kdup ieit bad ïa kren ïa khana, Kumno phi lah don khun? La kylli u Saïantis. Hooid nga la don ar ngut phi pat? Kylli u Mishonari, Nga te ngam lap phi ban wad tnga namar ba la bunkam palat jubab u Saïantis da kaba rymmuiñ artad. Te phi trei aiu pat manla ka sngi? La kylli u Saïantis. Nga shu trei tang i kam barit eh ha ka kam mishonari ban ïalap ïa ka khubor shaphang U Blei la jubab u Mishonari. Shish ! phi kata ka dei tang ka jingngeit biej suda mano ba ong ïa phi ba don U Blei, nga la pynlut por bun snem ban wad ïa u ta u Blei ba phi ong ngam shym la shem satïa haei u shong. Kane ka dei tang ka kam kai suda la ong u saïantis.
U lok haba u ïohsngew ïa ki kyntien u saïantis u la sngewsih shi katdei eh bad u la mut ban ïa kren ïa khana ban pynsngewthuh ïa u shapang U Blei hynrei um ïoh por ba bun palat ki briew. Kumta ynda la miet u la leit phai sha la ing u ne u Mishonari u la shu pyrkhat sah ïa ki jingkren jong u bad u la kylli wei briew balei keiñ mynshwa ngi ïa leit lang sha jingïaseng bad u ieit bad tieng ïa U Blei hynrei mynta pat u kylla long kumne?.
Hadien 3 snem u ne u paralok mishonari u la khot sngewbha ïa u ne u lok saïantis ba un pyllait por ban wan khnang ha ka jingkhawai sngi kha ki khun jong u. Kumta u ne u saïantis ruh namar ba la khot u lok ba ieit eh u la wan pyllait bad wan shisha ha ka sngi khawai ha ryngkat ki nongbud jong u. Tang shu rung ha ïing u mishonari u ne u saïantis u la peit ïap bieit ïa ka sad ïing ba la sad itynnad bha jong u ne u mishonari bad u la kylli, Mano ba shna ïa kane ka sad ïing jong phi? kaba da itynnad palat shisha ba ngan phah shna lem. jubab u Mishonari don ba shna. Mano keiñ la kylli u Saïantis, Don ba shna la jubab u Mishonari. Une u Saïantis u la dom Mano keiñ? haba don kumta te ïathuh kyrteng. Lok ba ieit nga kynmaw biang biang kumba lai snem mynshwa phi ong ïa nga ba ym don Blei ha ka pyrthei bad ka jingngeit ba don u Blei ka dei tang ka jingngeit bieit.
Hato pyrkhat sa ma phi hato katei ka bneng kan shu long hi seh lada um don U Blei ba thaw ïa ka? Hato um dei U Blei u ba thaw ba pynlong ïa ka. Lada ym don u nongthaw nongpynlong ka bneng kam lah ban long hi bad lada ym don u nongshna katei ka sad kam lah ban shu long hi kumtei kumba ka long dei ba don u nongshna la ong u Mishonari. Phi ong nga la pynlut por bun snem ban wad ïa U Blei, hato phi la wad ïa U Blei da ka dohnud baroh bad da ka jingsngewrit? Ha leh phi wad da ka jingsngew sarong? Hato phi la khot kyrpad ïa u kumba phi khot kyrpad ïano re ïano? Hato phi la pyrkhat mano ba la thaw bad ba pyrsad mynsiem ïa phi? Hato phi lah kylli ïa lade mano ba la pynkhïah ïa ka jingpang jong phi ha kato ka por ba dang khynnah? Phi kynmaw ba ngi ïa duwai lang bad phi bad U Blei u la pynkhiah ïa phi? Kine ki kyntien ki la ngam bad dung ngak ha ka dohnud u Saïantis, bad u la sdang ban sngewthuh pleng U Blei u don.
Kane ka khana ka pynshisha ba U Blei u don tangba ngim lah ban ïohi ïa U Blei da ki khmat briew ba kynja doh. Namar u Blei u long u kynja Mynsiem (God is spirit) (Ioannis 4:24) ka ktien U Blei ka ong “Wat ai ba u riewstad un sarong ha la ka jingstad, lymne u ba khrawbor yn ym sarong ha la ka bor, u riewspah yn ym sarong ha ki spah jong u. Hynrei to un sarong ha kane ba u shemphang bad ithuh ïa Nga, naba ha kine kiei kiei Nga sngewbha keiñ” (Jeremaïah 9: 23-24) Naba u briew um lah keiñ ban ïohi ïa Nga bad ba un im” (Exodus 33:20) watla U Blei u don hajan eh bad phi phin ym lah satia ban ïohi da ka khmat briew bad u ktien U Blei ka la ong shai, “Hynrei ïa ka khmat jong Nga – Men ym ïohi keiñ”. (Exodus 33:23) U Blei haba u pynithuh ïa ha u Moses ïalade u ong, “NGA LONG BA NGA LONG”. “Kane ka long ka kyrteng jong nga HA LA KA RTA, (Exodus 3:15-16).

Leave A Reply

Your email address will not be published.