Nongstoiñ, Jymmang 20: Ka kur Marweiñ ka kur kaba la bun pait haduh katta katta hapoh ri Khasi Jaiñtia bad kaba la sdang ban lum lang ïa ki kur ki jait na baroh kawei ka ri lum Khasi Jaiñtia, ka la rai ban pynlong biang ia ka dorbar bah kaba shisien ar snem.
Kane ka rai ka la mih ha ka sngi palei ha Nongstoin West Khasi Hills ha kaba la don lang da ki rangbah kur na kylleng ka District. Ka dorbar bah kaba la ioh pynlong khatduh ka la long ha Nongdom Parïong ha u snem 2019 bad na ka daw jong ka jingwan lynshop ka khlam Covid 19, kumta ha u snem 2020 haduh 2022 ym shym la lah shuh ban pynlong ïa ka dorbar bah.
Kumta ha katei ka sngi ki nongkitkam jong ka kur lem bad ki dkhot jong ka Executive Committee, ha ka jingïakynduh lang ha Nongstoiñ, ki rangbah kur naduh ri Bhoi, East Khasi Hills, Eastern West Khasi Hills, South West Khasi Hills ban West Khasi Hills ki la ïapoi.
Ha ka jingïakynduh lang kaba la pynlong ha ïing jong u bah R.P.Marweiñ, la pynïaid da u bah Trelington Marweiñ u ba dei ruh u President, la ïatai sani ïa kiba bun ki kam jong ka kur ki bym pat lah ban pynep bad ki ban sa nang pyndep. Kumjuh ruh kumno ban pynkhlaiñ shuh shuh ïa ka Dorbar kur, na ka bynta ban wanrah ïa ka jingïalong shi tylli khamtam eh ban lait na ka sang ka ma wat la ha kine ki lai snem ym shym la ïoh ban pynlong ïa ka Dorbar bah.
Ha katei ka sngi ka jingïalang ka la ïakut ba ïa baroh ki nongkitkam bad ki dkhot ka Executive Committee, watla ka samoi treikam jong ki kaba long lai snem ka la kut, yn pynneh biang ïa ki juh lait noh ïa kiba la khlad noh kum u (L) bah W.G.B.Marweiñ, u (L) bah Readington Marweiñ, u (L) Bah Bransley Marweiñ la pynrung thymmai noh da kiwei ki rangbah na ka kur.
Ka jingïalang ka la ïakut ruh ba yn pynkhlaiñ shuh shuh ïa ka kur ka jait da kaba jied ïa ki rangbah na ka kur, ba kin leit ban pynshai biang sha ki khatar tylli ki shnat treikam kum ha ki shnat treikam kiba don ha ri Bhoi, East Khasi Hills kaba la khot ka Kur Marweiñ Shillong Region, Eastern West Khasi Hills, South West Khasi Hills bad West Khasi Hills District.
Ka kam ka long ba kin leit jngoh bad ban pynkhie im biang ïa ka jingtreikam namar ïa ka Dorbah bah jong ka kur lah ban pynlong biang ha u snem ban wan. Nalor kata ka jingïalang ka la ïakut ruh ba ki Rangbah Kur ki dei ban bthah ïa ki shnat treikam ba ha man ba long ka Executive Committee, ki dei ban phah kawei ka longkmie na man kawei pa kawei ka shnat treikam ba kin wan mihkhmat na ka bynta ki kynthei hapoh ka kur ka jait. Ha katei ka sngi ka jingïalang ka la ïakut ruh ba ïa baroh ki kam kiba dang sahteng yn sa ïakren biang ha kawei pat ka Executive Committee.
