Shillong, Nohprah 15: Mynta ka sngi u CEO jong ka N.E Starlight Entertainment u Bryan K Sangma u la pynbna ba ïa ka “Tamasa ban pyntbit pynwan dur ïa ki jaiñphong” kab long ar sngi lynter ha ka 18 bad 19 tarik Kyllalyngkot 2024 ha Hotel Vivanta.
Haba kren sha ki lad pathai khubor mynta ka sngi ha Shillong Press Club u Director ba dei peit ïa kane ka jingpyniriam, u Rittick Sharma Tamuli, la ong ba kane ka Tamasa kan long ka sien kaba nyngkong ha Meghalaya, kane ka long ban plie lad ïa ki riew don sap ha ka suh jaiñ.
Ha kane ka tamasa ki riew tbit suh jaiñ na baroh kane ka thaiñ shatei lam mihngi jong ka Ri India kin wan ban ïa shimbynta ban pyninam ïa ka rukom suh ïa ki riam ki beit jong kane ka thaiñ, ha kitei ki ar sngi kin don ruh ki nongthied ki ban wan peit na sha bar.
U bah Brandon Sunn u wei na ki nongseng ïakane ka N.E Entertainment ula ong ba ka thong ka long ban pdiang 25 ngut ki nongsuh jaiñ kiba tbit ïa kaba kin sa jied na pdeng kiba la apply ban ïa shim bynta, kin don ki 80 ngut ki Model ban pyni ïa ki riam kiba la suh bad ki ban pynriam ïa ki kin long 40 ngut ki nongpynriam.
Haduh mynta ki aplikeshon kiba la ïoh ki long 10 ngut na Meghalaya, 3 na Assam katba na Sikkim, Nagaland Manipur ki dang poi tang mar kawei ka aplikeshon, ki kyrmen ba kin ïoh pdiang shibun ki jingtyrwa ki ban ïa shim bynta ha kane ka Tamasa.
