Ryngkat ki takma wanphai ïing ki rang bad thei ïakhun kti ka jylla na ka lympung World Arm Wrestling Championship ha Moldova

Nongpoh, Nailar 26: Ki rang bad thei ïakhun kti jong ka jylla Meghalaya kiba leit ban mihkhmat ïaka ri India sha ka rynsan 2024 World Arm-wrestling & Para-Arm-wrestling Championships haka ri Moldova kila wanphai noh shala iing ryngkat 9 tylli ki takma haki rynsan ïakhun bapher bapher.
Ïa kitei ki rang bad thei ïakhun kti ka jylla la pdiang burom ïaki mynta ka sngi ha Nongpoh daka seng HNYF Northern Region da ki syntiew bad jaiñ Ryndia kum ka dak ka jingsngew sarong bad ka jingkmen halor ka jingjop jong ki haki rynsan bapher bapher bad kumjuh ruh ka jingioh khur takma ha katei ka rynsan ïakhun kti ba heh haka pyrthei.
Kitei ki rang bad ki thei ïakhun kti kiba la ioh ban kur ïaki takma ki kynthup ïa ka kong Starina Jasain, ka la ioh ban khur ïa ka takma rupa haka jingïakhun Left hand Grand Master Women haka kyrdan kaba 60 Kg bad ioh ruh ban khur ïa ka takma rnong haka jingïakhun Right Hand Grand Master Women haka kyrdan kaba 60 Kg.
Ka kong Margaret Pathaw ka la khur ïa ka takma rnong haka jingïakhun Left Hand Master Women haka kyrdan 60 kg bad takma Rupa haka jingïakhun Right Hand Master Women haka kyrdan 60 Kg.
Ka kong Mihsngewbha Rymbai ka la khur ïaka takma rupa haka jingïakhun Left Hand Grand Master Women haka kyrdan kaba 80 Kg bad kumjuh haka jingïakhun Right Hand Grand Master Women haka rynsan kaba 80 Kg ka la ioh ban khur ïaka takma rupa.
Ka Samla Senebi Syngkli haka jingïakhun kti jong ka diang bad ka mon ka la ioh ban khur haduh 2 tylli ki takma rnong bad u bah Hubert Paliar haka jingïakhun kti jong ka Para Arm-wrestling u la ioh ban khur ïaka takma rnong haka kyrdan 60 kg.