Mih shakhmat ka MACC ban tuklar halor ka jingkiew dor ki marbam mar dih ha ka jylla

Shillong, Nailar 26 : Ka jingkiewdor jongki marbam mardih kiba bun kiba don hapoh ka Jylla Meghalaya kum u khaw, ki jhur, ki soh, u phan, u piat kynthuplang haduh ka dohmasi, dohsniang ne dohkha kumjuh lada phai halor ka pylleng pham lem bad kiwei kiwei kumba ki paidbah ki ju pyndonkam manla ka sngi ka la pynlong haduh ban wanrah ïa shibun ki jingeh kumba ki ïakynduh ryngkatlang bad ka kamai kajih.
Lada phai khamtam halor jongki longïing kiba duk ba kyrduh ka la pynlong kum ka jingiuh roit kaba ban beiñ ïa ki khlem dalah shuh ban ïarap lem ïaka jingdonkam jongki hala kajong ka Jylla kumba ka paw, ong ka Meghalaya Awaken Concern Citizens (MACC) ha ka kyrwoh.
Ka kyrwoh, ka ong ruh ba lada kren ïa kane ka la paw shai kumba kala jia naduh kipor kumba 3 snem mynshuwa nalor ka jingwan lynshop jongka Khlam Covid-19 kaba dang wanrah shuh shuh ïa shibun ki jingjynjar ïa ki paidbah jongka Jylla halor kiba bun kat shaba phai ki liang da kaba ki ïohi ba ka don ka jingrem dor shaba palat ha kaba ymlah shuh ban thied bun katkum ki jingdonkam manla ka sngi haduh kat mynta.
“Na ka liang jongngi ka kynhun Meghalaya Awaken Concern Citizens (MACC) haba ïohi ïa kane halor kine ki sngi ba mynta watla ymshym la don ba kren la kalong kaba dei ne lait, hynrei ngi hap ban shim ïaka rai ban mih shakhmat da jingsynran ki paidbah kiba don jingkitkhlieh na bynta ka lawei jongka longïing longsem.
Ka kynhun kumba kala ïaid lynti naduh ki sngi ba la leit noh ban kren halor ka jingdie rem dor palat ïaka MRP ïa kiba bun ki Mardih lyngba ki Wine Store kiba don hapoh Shillong, bad mynta ka la pynlong shuh shuh ban ïaid shakhmat ha kaban tih bniah ïaka jing rem dor ki marbam ki bymdon MRP. Mynnin ka sngi la hap ban hiar hi da lade sha Iewduh ha kaban tih bniah halor kadaw bah kaba la pynlong ïaka jingkiewdor ki marbam mardih hapoh ka Jylla,” ong ka seng lyngba ka kyrwoh ba la phah da u Bah Banshai Marbaniang, President ka MACC.
La ong ruh ba ki lashem ia ka jingrem ha baroh ki lïang khmatam haba ïadei bad ki jhur, ki doh, ki soh, u khaw bad kiwei kiba bun haduh ymlah shuh ban sngewthuh ne wat ban buh jingkylli ïa kane ka bynta. “Haba shem kum ki jhur kiba bun kidei kiba mih napoh ka Jylla lajong bad balei pat haduh katne ki hap ban rem ka dor haduh wat ban thied ïaki ruh ymsngew lah shuh bad hap ban thied da kiwei pat ki jhur kum u phan kiba ïasyriem bad kiba wan nabar Jylla.
U phan Khasi la hap ban die kumba 50 tyngka shikilo bad u phan nabar jylla la die kumba 40 tyngka. Kiba bun ki Jhur kum u sohsaw, kajor, prisbin kiba la die haduh kumba 80 tyngka shikilo lem bad kiwei kiwei kynthup kat haduh u sohmynken kidei kiba dangmih napoh ka Jylla lajong bad ka jingkylli mynta pat kalong ba kaei kadaw ban hap die rem dor noh ïa kitei pat?. Kiei ki Tax kiba dang hap ban shim shibun na ki marbam kiba mih napoh ka Jylla lajong haduh ba ki nongdie ki hap ban die rem dor ïa kine baroh,” u la buh jingkylli.
“Na ka liang jongka kynhun MACC ka la shim ïa ka rai ba dei ban phah ruh ïa ka jingthoh shapoh ka Meghalaya State Consumer Disputes Redressal Commission kaba don hapoh ka Jylla Meghalaya lem kumjuh ban pynshai paidbah ha kaba ïadei bad ka Consumer Protection Act, 1986 kumjuh haduh ka Meghalaya Consumer Protection Rules, 1989 lem bad kiwei kiwei ki department ha kaba ïadei bad ki ki aiñ ki kyndon kiba lah ban pyrkhat ha kaba kumno ymlah ban ïada naka bynta ka jingmyntoi kaba donkam jongki paidbah kiba im hapoh kajong ka Jylla Meghalaya,” bynrap biang ka kyrwoh.