Ka jingwan ka Durand Cup Football ha Shillong ka la pyni shisha ïa ka jingieit Phutbol jong ki paidbah jong ka jylla khamtam eh na ka bynta ki jong ka Ri Khasi bad Jaiñtia. Hynrei hato kane kadei kaba da shongsit shisha ne kadei kaba shu ïashongshit shipor?. Namar ba ha Shillong hi ka Phutbok ka ju long beit kumne. Ha ka por ba ïakhun I- League nyngkong eh ka Shillong Lajong bad ka Mohun Bagan ruh ka JN Stadium ka la dap smam, kata ruh ha katei ka por ka dang kham ngiam bun ïa kaba ngiam mynta. Hynrei tang hadien katto katne por ka Stadium ka thylli bad don tang da ki khyndiat hajar ngut kiba wan kyrshan ha man ba ïakhun ka Lajong.
Kane ka jingshongshit ka la pynlong ruh ïa kiba bun ban pynsngew ba la donkam da ka Stadium kaba kham heh bad kaba kham ngiam bun briew, namar ba ha ka jingïalehkai Semi Final hapdeng ka Lajong bad ka NE United, ka jingïaknieh ticket ka long kaba la jur haduh katta katta. Kaba kham iphylla ka long ba wat ki Kynthei ruh ki ïa ïeng lain ban ïaknieh ticket kat haduh ba ka jingdie ticket ka long kaba sted haduh katta katta lyngba ka Online, ha kaba tang hapoh shiphew minit ka ticket ha ka first phase ka la lut. Nangta la ïohi ruh ïa ka jingthnum ka jingdu jong kiba bun ba ym ïoh ticket shuh wat haba la ïeng lain naduh mynstep ruh. Khlem pep kane kan dei beit ka jingshongshit kaba shipor, kaba lehse wat ki bym ju leit peit Phutbol mynno mynno ruh ki ïashongshit lang ban hiar sha Polo ban leit peitkai. Lada kane ka jingshongshit ki paidbah ka neh kumne haman ba don ki jingïalehkai lehse ka don ka jingkyrmen kaba khraw na ka bynta ka Phutbol ha Meghalaya.
Lada kren hi ïa ka jingshisha ym lah ban len ba ki briew jong ka Meghalaya kidei kiba ieit Phutbol. Lada leit kylleng kylleng ki Shnong jong ka jylla kidon beit ki Madan Phutbol wat ha ki Shnong ki bym don surok ruh, ka Madan Phutbol kin don beit bad yn lap beit man ka janmiet kin don beit ki khynnah bad ki samla kiban ïamih madan ban ïalehkai Phutbol. Ki paidbah haba don ki Tournament bad lada wan ki Player kiba kham tbit lei lei ki ïatuid da ki hajar ngut wat sha ki jaka ba jngai ruh. Nangta shuh shuh ki Khynnah rit, ki Samla ki ïapeit beit ha ki TV ne Mobile ïa ki League jong ki ri ka Pyrthei, kum ka English Premier League, ka Laliga bad kiwei kiwei bad kid a tip kyrteng hi ruh ïa ki Player jong ki team. Kane ka pyni ba ka don ka jingtip bad ka interest ïa ka phutbo ha kane ka ka bynta jong ka ri India.
Ki bor sorkar kidei ban shim kabu na kane ka jingieit phutbol jong ki paidbah ka jylla ban thaw ki lad ki lynti kumno ban kyntiew ïa ka phutbol ha kane ka jylla namar kumbaka long hi mynta, ka Phubol kam dei shuh tang ka jingïalehkai kilan met kum mynshuwa, hynrei ka la long ruh ka lad kamai kajih ïa kiba bun, khamtam eh ïa kito kiba tbit ban ïalehkai. Ki la don ruh ki Player kum u Eugeneson, u Aibor, u Redeem bad kiwei kiwei kiba la poi sha ki kyrdan kiba kham shajrong bad na ka Phutbol ki la ïoh ïa kamai kajih kaba biang.
Ka sorkar kadei ban invest ha ka Sport, kum ka jingpynbiang ïa ki madan ha kylleng kylleng ka jylla bad ka jingpynbiang kam dei eh ban don ki Stadium ne ki Mini Stadium, hynrei ki madan ban ïalehkai ne ka Pitch kaba ki ong, khnang ba kiba ïalehkai kin sngewtynnad bad kin lah shisha ban pyni ïa ka sap jong ki, ym kumba long mynta ka jaka shong ne ka gallery ka la biang bha, katba ka madan pat kadei da ka khyndew ne ka long ktieh tang shu slap. Nangta ruh ym donkam ban sam da ki jersey ne ki uniform, hynrei dei ban pyllut pisa na ka bynta ki training, ki coaching, namar ba kiba bun ki khynnah bad ki samla ki shu ïalehkai tang ha la ka jong ka jingtbit khlem da don pat ka coaching kaba biang.
Nangta donkam ruh ban shimkhia naduh ba ki khynnah ki dang rit la ka long ha ki skul ne ki shnong ki thaw ruh donkam ban thaw ki lad ki lynti ban don ki coaching camp ïa ki khynnah kiba dang rit khnang ba kine ki long ka lawei na ka bynta ka jylla hadien habud, namar kumba long mynta hi ka Phutbol ha Meghalaya ka kham shongshit ban ïa ha kiwei pat ki jylla. Hynrei da peit pat ha ka ISL, ha ka I League ne na ka team India ki samla na kane ka jylla ki duna bha. Dei namar kane ka daw hap pynkylla ia ka rukom treikam bad hap ban bud nuksa na kiwei pat ki ri ka pyrthei kiba la kiew bha ha ka jingïalehkai Phutbol.
